Ministrja e Jashtme Olta Xhaçka, ka dalë në një deklaratë për mediat, pasi raporti i progresit të Shqipërisë ju dorëzua sot zyrtarisht Qeverisë, nga ambasadorja e Bashkimit Europian në Tiranë.
Referuar deklaratës së saj, Xhaçka tha se raporti konfirmonte dhe njihte punën e madhe të bërë nga Shqipëria në rrugën e saj europianizuese. Sipas saj, marrja e këtij raporti “objektiv teknik” nga Këshilli i Europës, është një moment i rëndësishëm për gjithë shoqërinë shqiptare.
“Një moment i rëndësishëm për qeverinë, klasën politike dhe gjithë shoqërinë shqiptare. Ne marrim vlerësim objektiv teknik të punës që kemi bërë në lidhje me reformat e integrimit, por dhe një udhërrëfyes i punës që na pret në vijim. Një moment për të parë sesa përparim ka shënuar vendi në këtë rrugëtim modernizues dhe europianizues.
Sot, pas marrjes së raporti mund të ndihemi të gjithë mirë, sepse ky raport, i pari pas hapjes së negociatave, e njeh punën e madhe që është bërë dhe konfirmon progresin e Shqipërisë.
Më konkretisht raporti flet, dhe citoj, për një njohje të angazhimit të qëndrueshëm të arritjeve të reformave dhe qëndrueshmërisë së Shqipërisë për të ecur përpara në rrugën e saj drejt BE. Shqipëria ka vazhduar të përmbush të gjitha kushtet e Këshillit të marsit 2020 për Konferencën e parë Ndërqeveritare”, u shpreh ministrja e Jashtme, Olta Xhaçka.
