Presidentja e Kosovës, Vjosa Osmani, gjatë një interviste për të përditshmen italiane “Corriere della Sera” theksoi se Serbia po cënon sigurinë e rajonit duke mbështetur grupin mercenar ëagner. Osmani theksoi se Beogradi po luan duke ndjekur skemën imperialiste të Putinit duke menduar se mund të pushtojë territore të vendeve fqinje. Kryetarja e shtetit nënvizoi se presidenti serb, Aleksandër Vuçiç, është përgjegjësi kryesor për krizat e shpeshta në Veri të vendit, pasi atje financon dhe armatosë mafian ballkanike, me pjesëtare të shumtë të sanksionuar nga Shtetet e Bashkuara të Amerikës dhe Britania e Madhe.
“Rusia dëshiron të zhvendosë vëmendjen e Perëndimit në Ballkanin Perëndimor për ta shpërqendruar nga Ukraina. Për këtë, Serbia kërcënon sigurinë duke përdorur forca që bashkëpunojnë me grupin ëagner, blerë armë ruse, dërguar paramilitarë në Veri të Kosovës dhe vendosur barrikada për të krijuar tensione”, tha Osmani.
Ajo konfirmoi se Kosova po punon ngushtë me aleatët perëndimorë, në mënyrë që paramilitarët e lidhur me ëagner të dështojnë në planet e tyre destabilizuese. Presidentja i rikthehet sërish homologut serb, duke thënë se Vuçiç po luan rolin e një “Drama Queen”, i cili bën dhe si piroman ashtu edhe zjarrfikës. Ndër të tjera, Osmani konfirmoi gatishmërinë e Kosovës për një marrëveshje për normalizimin e raporteve me Serbinë, kundërshtoi krahasimin e Putinit për atë që po bën në Ukrainë me ndërhyrjen e NATO-s kundër luftës mizore të Millosheviçit në Kosovë, si dhe konfirmon se të drejtat e minoritetit serb janë të garantuar me kushtetutë, madje më mirë se çdo shtet tjetër në Europë.