Kryetari i PD-së, Sali Berisha teksa iu është përgjigjur interesit të qytetarëve që i kanë drejtuar pyetje në ‘Facebook’ pohoi se Gjykata njeh Kuvendin e 11 Dhjetorit, duke iu përgjigjur dhe zërave që mund të rrezikohen zgjedhjet e 14 majit për këtë parti.
Berisha tha se nëse merret vendim tjetër kundër, siç është dhe çështja e hapur ende në gjykatë për vulën e PD-së, do të jetë antikushtetues sipas tij.
“Vendimi i 25 marsit, që njeh legjitim dhe në përputhje me Kushtetutën, Kuvendin e 11 dhjetorit, është vendim që në çdo vend të lirë të planetit, ka vetëm një kuptim: regjistrimin në regjistrin e forcave politike.
Çdo vendim tjetër është antikushtetues dhe antiligjor.
Nëse Ali Basha ka pasur një të dhënë, një objeksion për vendimin e gjykatës, ai kishte të drejtë të hapte proces gjyqësor në Gjykatën e Tiranës, por ai nuk mund të bëhej palë kurrë në një proces ku nuk ishte palë.
Kështu që bërja palë e Alibashës me ndërhyrjen direkte dhe të fuqishme të Edi Ramës, dhe të McGonigal-it me fustan, siç e ka pohuar vetë, është një akt antikushtetues, antiligjor.”, tha Berisha.
