Drejtoria e Përgjithshme e Shërbimeve të Transportit Rrugor ka reaguar pas vendimit të Autoritetit të Konkurrencës për pezullimin e rritjes së çmimit të patentës. Përmes një reagimi për mediat DPSHTRR shpjegon se nuk ka përcaktim tarife apo kostoje, por sipas këtij institucioni janë referuese.
“…për përgatitjen për rimarrjen e leje së drejtimit pas humbjes totale të pikëve ose për heqje të saj, si dhe përgatitjen për pajisjen me dëshmitë dhe certifikatat e aftësimit profesional”, dhe jo përcaktimi i tarifës së pagesës dhe kostos minimale fiskale për përgatitjen dhe pajisjen me leje drejtimi. Sqarojmë edhe një herë se tarifa dhe kosto janë referuese dhe jo përcaktuese, për garantimin e zbatimit të detyrueshëm të kushteve të barabarta në mësimdhënie”, shkruhet në njoftimin e DPSHTRR.
Drejtoria e Përgjithshme e Shërbimeve të Transportit Rrugor thekson gjithashtu se qëllimi i marrëveshjes me Drejtorinë e Përgjithshme të Tatimeve dhe Autoshkollave është për t’I dhënë fund tregut të pandershëm dhe abuzimeve me dhënien e patentës.
“Qëllimi i marrëveshjes është sinergjia për t’i dhënë fund një tregu të pandershëm, që ka abuzuar mbi shërbimin e mësimdhënies për drejtimin e rregullt të një mjeti rrugor, për t’i shërbyer direkt interesit publik! DPSHTRR i qëndron pozicionit të marrjes dhe ushtrimit të përgjegjësive ligjore, duke përgëzuar DPT për vullnetin dhe bashkëpunimin institucional, për t’u përballur dhe jo fshehur, për t’u përpjekur, duke mos zgjedhur qasje populiste apo hipokrite!”, theksohet më tej në njoftim.
