“Fiks Fare” trajtoi mbrëmjen e së martës një rast specifik mbi dhënien e diagnozës nga një mjeke psikiatre për një person, pa e vizituar dhe pa ditur asnjë të dhënë për të.
Edhe pse në terr të plotë informativ mbi personin, mjekja psikiatre Greta Guga plotësoi një diagnozë kundrejt pagesës prej 5.000 lekësh.
Në redaksinë e emisionit “Fiks Fare” mbërriti një informacion se një mjeke psikiatre në Durrës lëshon raport mjekësor pa e parë pacientin. Mjafton t’i thuash diagnozën që do dhe kundrejt pagesës psikiatrja ta dorëzon në dorë.
Fakti bëhet edhe më interesant, por i rëndë njëkohësisht, kur Fiks Fare kupton se këtë gjë e dinë edhe mjekët e familjes. Emri i parë ku të adresojnë është mjekja Greta Guga.
Kështu fillon edhe investigimi i Fiksit. Një bashkëpunëtore e emisionit fillimisht i drejtohet një mjeke familjeje, të cilës i thotë hallin që ka. Ajo i tregon se bashkëshortit të saj i është refuzuar viza për jashtë shtetit dy herë dhe kërkojnë që të paraqesin një dokument, ku ai ka probleme të shëndetit mendor dhe duhet t’i bashkohet vëllait të tij për t’u kuruar atje. Këtë sugjerim sipas bashkëpunëtores së Fiks-it ia ka bërë një avokat dhe kërkon ndihmë se si mund ta marrë këtë raport mjekësor.
Mjekja e familjes e cila i ka dhënë një rekomandim tek një neurolog më përpara e pyet se çfarë ndodhi. Bashkëpuntorja e Fiksit i tregon se neurologu e kishte shumë të lartë pagesën rreth 100 mijë lekë për t’i dhënë raportin mjekësor që donte. Kështu mjekja e familjes i jep rekomandimin tjetër edhe pse personit që iu lëshua nuk ishte pacient i saj, kësaj radhe i përmend emrin e psikiatre Gretës duke i thënë bashkëpunëtores së Fiks-it që t’i fliste edhe asaj hapur se për çfarë e donte dokumentin.
Fillimisht duke mësuar se mjekja psikiatre ka dhe një klinikë private, bashkëpunëtorja drejtohet atje duke i thënë se i duhej një diagnozë për të shoqin sikur kishte probleme të shëndetit mendor, edhe pse në të vërtet ai gëzon shëndet të plotë. Mjekja psikiatre pranon pa asnjë hezitim t’i japë raportin kundrejt 5000 lekëve. Madje ajo e pyet edhe sesi e interesuara e do diagnozën. Pasi bien dakord psikiatrja i lë takim në poliklinikë të nesërmen në ora 13:00 ku merr edhe turnin. Aty ajo do i japi edhe raportin mjekësor, ku e interesuara do e paraqesë në ambasadë.
Pasi bën pagesën prej 5000 lekësh bashkëpunëtorja e Fiksit pajiset me diagnozën nga psikiatrja Guga. Në të shkruhet ekzaminimet “Çrregullim ankthi, pacienti me ankth, pagjumësi, ulje të oreksit, me atake paniku të herë pas hershme…” etj madje edhe trajtimi i rekomanduar. Më pas, në raport shkruhet “Të mbështetet nga familjarët, të rikonsultohet pas tre muajsh, por më kryesorja të shoqërohet nga familjarët sidomos vëllai që qëndron larg“.
Raporti përmban numrin e regjistrit 584, datën 28.03.2023 si dhe vulën e mjekes psikiatre Greta Guga. Pacientin për të cilin mjekja lëshoi raportin, as nuk e njeh dhe as nuk e ka parë asnjëherë në jetën e saj.
Por çfarë mund të bëhet më një dokument të tillë në dorë?
Fiks Fare pyeti disa avokatë që çfarë vlere ligjore ka ky raport dhe çfarë lehtësirash sjell për njerëzit që kanë kryer vepra penale.
Avokatët pranojnë që raporti është i ligjshëm dhe në çdo situatë që mund të ndodhet i akuzuari për vepra të ndryshme penale ka lehtësira ligjore. Me paraqitjen e një raporti të tillë një gjyqtar mund të ndërrojë masën e sigurisë të një akuzuari si për shembull nga arrest me burg në detyrim paraqitje./ tch
