Partia Demokratike zyrtare në një mbledhje urgjente zgjodhi Gazmend Bardhin si kreun e ri të Grupit Parlamentar të PD-së. Nis zbatimi i “planit B” në PD për rizgjedhjen e Lulzim Bashës si kryetar partie. Çfarë pritet në ditët në vijim dhe “rikthimi i Bashës”, në politikën aktive pasi një mungesë të gjatë.
PD-ja zyrtare, me volë e logo, por pa elektorat të madh mbështetës, ka nxituar të verë në zbatim projektin që ka kohë që mendohet. Dy ditë pas dorëheqjes së Enkelejd Alibeajt nga posti i drejtimit të Partisë Demokratike dhe Grupit Parlamentar të PD, ka ardhur edhe pasuesi i tij. Gazmend Bardhi është zgjedhur me 19 vota pro, përfshirë edhe Lulzim Bashën, për të qenë në krye të Grupit Parlamentar të PD-së. Mbledhja për këtë ndryshim ishte urgjente për të bërë fakt të kryer një process I cili mund të kërkonte më shumë kohë dhe analizë për rezultatin mjaft të rëndë në zgjedhjet lokale. Ndërsa Bardhi plotëson njërën pjesë të “planit B”, mbetet për tu zgjidhur diçka tjetër më e madhe. Kush do të jetë kryetari i ri i PD-së Zyrtare? Ajo që flitet dhe në vijim pritet të bëhet realitet është një rikthim i mundshëm i ish-kryetarit të PD-së Lulzim Basha. Në këtë mënyrë PD-ja shkon në planin e vjetër “BB”, Bsha-Bardhi, njëri kryetar partie dhe tjetri sekretar i përgjithshëm dhe kryetar i grupit parlamentar të PD-së. Ditët në vijim do të jenë vendimtare për Partinë Demokratike se si do ta vijojë rrugën e saj kur si pengesë ka gjithmon Sali Berishën. Këtë project e kupton edhe më mirë kreu i Rithemelimit, apo kryetari de fakto i PD-së tjetër Sali Berisha, i cili përballet me humbjen e thellë në këto zgjedhje përballë Ramës, por “fitoi bindshëm” ndaj grupimit Basha.
Zgjedhja e Bardhit
Grupi Parlamentar i Partisë Demokratike është mbledhur dje dhe ka propozuar zgjedhjen e deputetit Gazment Bardhi si Kryetar të Grupit Parlamentar të Partisë Demokratike dhe nisjen e procedurës së njoftimit të Kuvendit mbi emërimin e Kryetarit të ri të Grupit, pas dorëheqjes së Enkelejd Alibeajt. Grupi Parlamentar i Partisë Demokratike regjistron 33 anëtarë, nga të cilët kanë votuar pro të gjithë deputetët e pranishëm dhe asnjë kundër. Deputetët që kanë votuar pro kryesimit të grupit nga Gazment Bardhi janë: Jorida Tabaku; Orjola Pampuri; Arbi Agalliu; Dhurata Çupi; Kreshnik Çollaku; Saimir Korreshi; Lulzim Basha; Dashnor Sula; Gazment Bardhi; Lefter Geshtenja; Zheni Gjergji; Qani Xhafa; Helidon Bushati; Orjela Nebiaj; Ramadan Likaj; Xhelal Mziut; Flamur Hoxha; Eralda Bano dhe Bledion Nallbati. Gjithashtu ata kanë shprehur mbështetjen për kryesimin e grupit nga Gazment Bardhi deputetët e Partisë Demokratike që janë të regjistruar në grupet parlamentare të aleatëve të PD janë Merita Bakiu; Selaudin Jakupllari; Andia Ulliri; Emilja Koliqi. Mësohet se, në mbledhje kanë munguar deputetët: Agron Gjekmarkaj dhe Ferdinand Xhaferaj, deputetët e “grupit Berisha” Greta Bardeli; Lindita Metaliaj; Edi Paloka; Ervin Salianji; Tomor Alizoti; Sorina Koti; Bujar Leskaj; Isuf Çelaj; Ina Zhupa dhe Kastriot Piroli, si dhe deputetët Enkelejd Alibeaj, i dorëhequr nga pozicioni i kryetarit dhe Flutura Açka që ndodhet jashtë Shqipërisë.
Reagimi i Berishës
Ish-kryeministri Sali Berisha i cili sot mban vetëm selinë pa vulë dhe logo ka reaguar ndaj zgjedhjes së kryetarit të Grupit Parlamentar të Partisë Demokratike. Berisha në një reagim të tijin nuk e njeh zgjedhjen e re që u bë nga një grup deputetesh që mbështesin Lulzim Bashën. Për Sali Berishën ajo është një strukturë paralele të cilën nuk e njeh. Berisha pati një ftesë për këtë grup të demokratëve që ulen në bisedime. “Ne nuk njohim asnjë lloj strukture paralele të PD-së ne i ftojmë që të ulemi të diskutojmë, jemi të hapur ndaj tyre, por fakte të kryera ne nuk njohim, ka rregulla, statute”, tha Berisha. Thirrja e vetme e tij ishte që demokratët të bashkohen rreth tij dhe të vazhdojnë betejën kundër Edi Ramës.“Nuk kam asnjë koment, përveç komentit që unë ftoj të gjithë deputetët e PD të bashkohen dhe të vazhdojmë betejën për zgjedhjet e lira”, u shpreh Sali Berisha në konferencë për mediat.
