Një 25-vjeçar është gjetur i pajetë në një kanal vaditës në Mat, pas kërkimeve nga banorët e zonës.
Raportohet se 25-vjeçari ishte zhdukur prej ditës së djeshme, teksa kishte dalë për të mbledhur kërpudha në zonën pranë fshatit Shulbatër.
Familjarët lajmëruan policinë dje në mbrëmje, pasi djali i tyre nuk u kthye në banesë.
Gjatë kërkimeve ditën e sotme 25-vjeçari është gjetur i mbytur në një kanal vaditës, pa shenja dhune.
Hetimet vijojnë për zbardhjen e plotë të ngjarjes së rëndë.
Njoftimi i Policisë:
Shërbimet e Komisariatit të Policisë Mat, rreth orës 23.35, të mbremjes së djeshme, pas njoftimit të familjarëve, se shtetasi E.GJ., 25 vjeç, kishte shkuar në pyll, për të mbledhur kërpudha, dhe nuk ishte kthyer ende në banesë, kanë nisur menjëherë kërkimet në zonën e fshatit Shulbatër, për gjetjen e tij
Pas disa orësh kërkime, në bashkëpunim me banorët e zonës dhe familjarët e tij, është bërë e mundur gjetja dhe nxjerrja nga shtrati i një kanali me ujë vaditës, i trupit të pajetë të shtetasit E. GJ., 25 vjeç.
Nga këqyrja paraprake, nuk janë konstatuar shenja dhune apo dëmtime të tjera. Nga veprimet e para hetimore dyshohet se ky shtetas është mbytur aksidentalisht.
Grupi hetimor, në drejtimin e Prokurorisë, vijon punën hetimore për zbardhjen e plotë të rrethanave të kësaj ngjarjeje.
