Shqipëria këtë vit ka tërhequr vëmendjen e mediave ndërkombëtare për numrin e madh të turistëve që po e vizitojnë.
Këtë herë është “Financial Times” që i ka kushtuar një shkrim Shqipërisë me titullin “Italia e vogël: turistët vërshojnë në resortet me kosto të ulët të Shqipërisë”.
Në shkrim thuhet se italianët, por jo vetëm po zgjedhin që pushimet verore t’i kalojnë në plazhet, malet e Shqiëprisë. “Financial Times” shkruan se italianët kanë ikur nga vendi i tyre për shkak të motit ekstrem dhe kanë zgjedhur Shqiëprinë për shkak të çmimeve të ulta.
“Shumë pushues në Shqipëri janë italianë që i kanë shmangur udhëtimet brenda vendit. Mediat tradicionale në Itali e kanë cilësuar gjithashtu Shqipërinë si destinacionin “it”, duke lavdëruar plazhet e saj me rërë fildishi si Karaibet e Evropës.
Ndërsa çmimet janë rritur në Itali, turistët ndërkombëtarë janë joshur nga kostot më të ulëta shqiptare për çdo gjë, nga akomodimi në hotel deri te restorantet dhe shezlongët. Agjencia Federale e Statistikave të Gjermanisë zbuloi së fundmi çmimet e restoranteve dhe hoteleve në Shqipëri ishin 56 për qind më të ulëta se ato të Gjermanisë – duke e bërë atë destinacionin më të lirë të pushimeve në Evropë.
Disa blogerë udhëtimesh italiane kanë promovuar gjithashtu udhëtime në Shqipëri, vetëm një “shëtitje me traget të lirë” larg”, thuhet ndër të tjera në shkrimin e “Financial Times”./nsh
