Punimet në rrugën e re Elbasan – Qafë Thanë, pjesë e Korridorit 8, po vazhdojnë me ritëm të lartë dhe shumë shpejt pritet të nisë asfaltivimi për një segment prej 5 kilometrash.
Kjo rrugë e re që po bëhet do të shkurtojë kilometra dhe kohë për t’u lidhur me Maqedoninë e Veriut, që parashikohet të bëhet përmes një pike të re doganore.
Segmenti i ri pritet që të lehtësojë ndjeshëm kohën dhe kostot për transportimin e mallrave.
Drejtori i Autoritetit Rrugor Shqiptar, Evis Berberi, i ftuar në studion e Klan Neës me gazetaren Anjola Hamzaj, tha se pala maqedonase ka parashikuar që Korridori 8 të përfundojë në fund të vitit 2027.
Pjesë e këtij segmenti të ri që do të lidhë Shqipërinë me Maqedoninë e Veriut, do të jetë edhe një tunel me gjatësi 6 kilometra në total.
Nësë gjithçka shkon siç duhet, ka një parashikim se kur mund të përfundojë Korridori 8?
Drejtori i ARRSH Evis Berberi: Ne jemi dakordësuar me palën e Republikës së Maqedonisë së Veriut që ata nëse çdo gjë ecën mbarë, përfundojnë në fund të vitit 2027 Korridorin 8 të tyre, pa marrë parasysh pjesën e re që kemi projektuar, pasi do të bëhet një tunel.
Ne vijmë në një kuotë diku 800 metra pasi është përzgjedhur 800 metra për shkak se niveli i borës në atë zonë është 900 metra dhe ne zbresim 800 metra që mos të kemi dhe problemet e mirëmbajtjes që parashtrohen nesër.
Duke qenë se kjo është një pikë e re, ndryshim projekti për palën e tyre dhe një tunel që do të bëhet nga të dyja palët, 3 kilometra nga ne dhe 3 kilometra nga ata, ata (Maqedonia e Veriut) kanë parashikuar 2027, por mund të shkojë edhe pak më tepër pasi jemi në diskutime.
Dhe ne mendojmë që 2027 është e përshtatshme dhe për ne pasi dhe parashikimet buxhetore që ne kemi bërë i kemi bërë që brenda vitit 2027 ta kemi mbaruar dhe ne segmentin tonë të paktën nga Elbasani deri në pikën e re doganore, pa përfshirë këtu tunelin sepse është në diskutim e sipër.
Dhe pritet që të ketë një impakt apo jo, në ekonomi, në lehtësim lëvizje?
Drejtori i ARRSH Evis Berberi: Patjetër. Minimalisht shkurtojmë 20 kilometra. Vetëm kaq po të përkthehen në kohë, vlera monetare dhe shpejtësi lëvizje, është mëse e justifikuar ndryshimi i pikës së re doganore dhe pikës së re lidhëse me Republikën e Maqedonisë së Veriut. Pa marrë parasysh që duke qenë se Porti i Thatë do të bëhet në Strugë dhe nyja dalëse është po në Strugë, fluksi i lëvizjes për mallrat është shumë herë më i madh, pasi ne mendojmë që ekonomia vërtetë merr çdo gjë nga turizmi, por Korridori 8 në kohën kur është bërë vija Egnatia dhe gjithë kohës që është projektuar, është projektuar si një korridor lëvizje për mallra.
Pjesa tjetër e lëvizshmërisë turistike i kalon Pogradecit dhe Pogradeci rri i qetë. Në zonën e Boshticës merr majtas, shkon në Maqedoninë e Veriut për mallrat dhe për çdo gjë tjetër, por ama nëse do të shijosh Pogradecin e shijon i qetë pa pasur prezencën e të gjitha mjeteve të rënda dhe të një fluksi lëvizje i cili nuk është i destinuar për turizmin në Pogradec. Pra, kemi dy të mirë; i japim shkurtim dhe kohë më të shpejtë lëvizje mallrave, por nga krahu tjetër lehtësojmë të gjithë aksin i cili deri sot dhe deri kur të mbarojë aksi i shkon Pogradecit si ngarkesë dhe i jep një frymëmarrje të madhe turistëve të cilët nuk e kanë më këtë pengesë për të vizituar Pogradecin, Korçën dhe zonat përreth.
Kjo rrugë do të lidhë vendin tonë me Greqinë, Maqedoninë e Veriut dhe Bullgarinë, ndërsa do të kthejë portin e ri tregtar të Durrësit në një pikë strategjike./ S.M
