Në shtatorin e vitit 490 p.e.s. Filipidesi i Athinës, u dërgua në Spartë për të kërkuar ndihmë kundër persianëve që kishin zbarkuar në Maratonë. Ai u nis me vrap për në Spartë dhe u kthye pa mundur të sigurojë ndihmën.
Athinasit e fituan betejën dhe Filipides, megjithëse i plagosur, u dërgua përsëri, këtë herë nga Maratona drejt Athinës, 42 km larg, për të dhënë lajmin e fitores. Fjala e tij të fundit, para se të binte pa frymë ishte “Fituam”
Për nder të Filipides, gara e vrapimit e quajtur “Maratonë” u bë pjesë e Lojërave të para Olimpike bashkëkohore që u mbajtën në Athinë në vitin1896. Distanca 42,195 km u pranua zyrtarisht në vitin 1924 në Olimpiadën e Parisit.
Por… historianët thonë se edhe pse Filipides ka ekzistuar si person historik, vrapimi i tij nga Maratona në Athinë nuk ndodhi. Herodoti, ati i historisë, shkroi 40 vjet pas betejës së Maratonës se Filipides apo Feidipides ishte lajmëtari që u dërgua nga athinasit në Spartë (230 km larg) për të kërkuar ndihmë, por nuk e përmend vrapimin nga Maratona në Athinë. Përfshirja e garës së Maratonës në lojrat olimpike mendohet se u frymëzua në vitet 1800 kur Robert Browning botoi poemën “Pheidippides”, e cila u bë mjaft popullore. Nga kjo poemë duket se u frymëzua edhe Fan Noli kur shkroi: “Rent or Marathonomak…”
Kalendar
1666 – Zjarri i madh në Londër që zgjat për tri ditë duke lënë të djegura rreth 10,000 ndërtesa.
1870 – Forcat Prussiane sulmuan ushtrinë e perandorit francez Napoleoni III dhe 100,000 i zunë rob.
1945 – Fundi i Luftës së Dytë Botërore pas dorëzimit të trupave japoneze më 15 Gusht 1945.
1987 – Filloi në Moskë procesi kundër pilotit Mathias Rust, që aterroi me Cesnën e tij në Sheshin e Kuq në maj të vitit 1987
1991 – Kombet e Bashkuara njohën pavarësinë e shteteve Baltike Estonisë, Latvisë dhe Lituanisë.
1998 – Swissair Flight 111 u rrëzua afër Peggys Cove, Nova Scotia, 229 udhëtarët e gjetën të gjithë vdekjen.
