Kryeministri Edi Rama ka njoftuar se ka gati Episodin e parë të Podkastit “Flasim”, ku të ftuar ka trajnerin e “mrekullive” Sylvinho dhe dy ndihmësit e tij, Pablo Zabaleta dhe Dorival Guidoni.
Kreu i qeverisë bën me dije se të shtunën e ardhshme mund të ndiqni live podkastin e tij me “treshen e kampionëve, që në udhëheqjen e trajnerit Sylvinho ka ngjitur Kombëtaren Kuqezi në një nivel të ri.”
© credits facebook.com/ediramaal
Kombëtarja Shqiptare zhvilloi dje një ndeshje historike përballë Polonisë, në kuadër të eliminatoreve të kampionatit evropian “Euro 2024”.
Kuqezinjtë arritën të mposhtin polakët me një performancë të jashtëzakonshme dhe me gola që do të mbahen mend gjatë.
Ishte fantazisti Jasir Asani ai që “çoi peshë” zemrat e shqiptarëve në stadium dhe kudo që po shijonin këtë ndeshje, me një super gol nga distanca në minutën e 37 që bëri jehonë ndërkombëtare.
Në pjesën e dytë, Shqipëria e nisi me eufori ndeshjen me raste të krijuara, të cilat u shpërblyen në minutën e 62 me insistimin dhe fuqinë e Mirlind Dakut, i cili tundi rrjetën e portjerit polak vetëm disa sekonda pasi hyri në fushë.
Shqipëria vazhdon tani me kokën lart rrugën për në Berlin, e para në grupin E në kuotën e dhjetë pikëve, me tre finale që na presin ku më e rëndësishmja do të jetë ajo e 12 tetorit në “Air Albania” përballë Republikës Çeke./ S.M
