Kjo e mërkurë pritet të shënojë dhe takimin e radhës të përbashkët mes deputetëve të Partisë Demokratike, mbështetës të grupimeve Berisha dhe Bardhi.
Gazetari i Euronews Albania zbuloi detaje të reja në lidhje me vendimet që pritet të merren nga takimi i përbashkët i deputetëve.
Gazetari tha se deputetët opozitarë pritet të firmosin ngritjen e tre komisioneve parlamentare, të cilat do të dorëzohen më pas në Kuvend.
Ai shtoi se mbledhje të tilla pritet të kthehen në takime mes deputetëve të opozitës në prag të çdo séance plenare me qëllim që të koordinojnë aksionin opozitar.
“Diskutohet për axhendën parlamentare të opozitës, siç u ra dakord në mbledhjen e parë. Edhe në mbledhjen e sotme në fokus do të jetë rendi i ditës së seancës plenare të nesërme.
Mbledhje të tilla të deputetëve të opozitës do të kthehen në një rutinë përpara çdo seanca parlamentare për të kordinuar aksionin opozitar.
Gjatë mbledhjes së sotme priten të dorëzohen materiale konkrete për tre komisionet të cilat deputetët e opozitës do të hedhin firmat.
Bëhet fjalë për komisionin hetimor për skandalin e të dhënave të TIMS, komisioni për të gjithë problematikat në sistemin e shëndetësisë dhe një komision hetimor që ka të bëjë për lidhjet e familjarëve, nepotike dhe biznesmenëve të ndryshëm me anëtarë të kabinetit qeveritar.
Deputetët e opozitës pritet të hedhin sot për ngritjen e këtyre tre komisioneve dhe më pas ato të dorëzohen në Kuvend”, tha gazetari. / S.M
