Komisioni Qendror i Zgjedhjeve ka kryer sot testin e fundit të pajisjeve teknologjike, që do të përdoren për zgjedhjet e pjesshme të 24 shtatorit në Bashkinë Kukës.
Gazetarja raporton se janë 74 qendra votimi dhe në çdo qendër do të behët identifikimi elektronik I votuesve, ashtu siç u bë me 14 maj.
Krahas kësaj KQZ-JA ka menduar edhe për surprizat e pakëndshme që mund të ndodhin ditën e zgjedhjeve dhe për këtë ka vënë në dispozicion edhe një numër shtesë të pajisjeve, të cilët mund të përdoren në rast nevoje.
Gjithashtu KQZ-ja kishte planifikuar të kryente një trajnim më anëtarët e komisioneve për zgjedhjet në Kukës, por Lulzim Basha duket që është bërë sërish pengesë pasi nuk i ka dërguar të gjithë emrat që do jenë në detyrë më 24 shtator.
Ai ka regjistruar partinë në zgjedhje, por jo emër kandidati për Bashkinë Kukës duke e lënë betejën kundër socialistëve në dorë të koalicionit “Bashkë Fitojmë”.
“Duket që nuk është gati Lulzim Basha, edhe pse ka fituar të drejtën në Kolegjin Zgjedhor për të pasur komisionerë në një palë zgjedhje ku ai nuk merr pjesë nuk e ka plotësuar ende këtë numër.
Lulzim Basha dy anëtarë të KAZA-së Kukës i ka dërguar në detyrë, por sa i takon anëtarëve të Komisioneve të qendrave të votimeve dhe grupeve të numërimit që punojmë të dielën ende nuk është plotësuar, madje nga 74 që janë për të plotësuar, në vetëm 20 prej tyre i ka dërguar emrat”, raportoi gazetarja/ S.M
