Një gjykatë indoneziane këtë javë dënoi një grua me dy vjet burg për shkelje të ligjit të blasfemisë për postimin e një videoje në TikTok në të cilën ajo thotë një lutje muslimane dhe më pas ha mish derri .
Indonezia është vendi me popullsinë më të madhe myslimane në botë dhe mishi i derrit konsiderohet, sipas Islamit, “haram”, pra i ndaluar.
Lina Lutfiavati, e njohur gjithashtu si Lina Mukherjee, e cila e përshkruan veten si muslimane, sipas dokumenteve të gjykatës, postoi një video TikTok në mars, në të cilën ajo tha një lutje, e cila përkthehet si “në emër të Zotit”, përpara se të hante patatina derri krokante. .
//
Gjykata në qytetin indonezian të Palembang, që ndodhet në ishullin Sumatra, e dënoi atë dje për veprimet e saj, duke vendosur se ajo “përhapte qëllimisht informacione që synonin nxitjen e urrejtjes ose armiqësisë individuale/grupore bazuar në fenë”, sipas një dokumenti gjyqësor.
Gjykata e urdhëroi atë të paguante një gjobë prej 250 milionë rupi (rreth 15,000 euro).
Kritikët argumentojnë se ligjet e rrepta të blasfemisë së Indonezisë po përdoren për të minuar reputacionin e gjatë të vendit të Azisë Juglindore për tolerancë dhe multikulturalizëm.
Lina u tha gazetarëve pas gjyqit se ishte e befasuar nga vendimi.
“E di që ishte faji im, por nuk e prisja këtë dënim”, tha Lina për stacionin lokal të lajmeve MetroTV.
Usman Hamid, drejtor ekzekutiv i Amnesty International Indonesia, tha se seksioni i blasfemisë i ligjit indonezian po keqpërdorej për të synuar grupet e pakicave dhe disidentët.
“Nuk është në përputhje me detyrimet ndërkombëtare të Indonezisë për të respektuar dhe mbrojtur lirinë e mendimit, ndërgjegjes dhe shprehjes së fesë ose besimit të dikujt, lirinë e mendimit dhe të shprehjes,” tha ai.
Ligji i blasfemisë është përdorur kryesisht kundër atyre që akuzohen për fyerje të Islamit, duke përfshirë ish-guvernatorin e krishterë të Xhakartës, Basuki “Ahok” Purnama, i cili në vitin 2017 u dënua me dy vjet burg për blasfemi me akuza që shiheshin gjerësisht si të motivuara politikisht.
Këshilli Ulema i Indonezisë, një organ i lartë klerik, argumentoi në gjykatë se veprimi i Linës ishte blasfemi kundër Islamit, sipas një dokumenti gjyqësor./E.T
