Në orët e para të mëngjesit të së mërkurës është ndarë nga jeta Gianni Vattimo. Filozofi me origjinë italiane fillimisht është shtruar në spitalin Rivoli (Torino) në gjendje të rëndë.
Lajmi i ndarjes nga jeta është bërë i ditur në një postim në Facebook nga Simone Caminada, asistent dhe shoqërues i filozofit prej 14 vitesh.
Vattimo u shua në moshën 87-vjeçare dhe ishte i njohur për zhvillimin e konceptit të “mendimit të dobët” si një kritikë e metafizikës tradicionale. Ai ishte gjithashtu një parlamentar evropian.
Por kush ishte Gianni Vattimo?
Vattimo lindi në kryeqytetin piemontez më 4 janar 1936. Ai mund të konsiderohet si studiuesi më i madh i mendimit të Martin Heidegger-it, pasi ka pasur mësues të tillë si Hans Georg Gadamer.
Antidogmatik, besimtar i patundur në faktin se rendi autentik i gjërave nuk mund të përshkruhet në mënyrë filozofike apo shkencore, ai kritikoi çdo pozicion metafizik.
Me Pier Aldo Rovatti ai redaktoi një përmbledhje me ese mbi të menduarit e dobët në 1983, nga të cilat ai u konsiderua si eksponenti më i madh. Gjithmonë është përpjekur t’i bëjë teoritë e tij të aksesueshme edhe për publikun më pak të kulturuar, me shkrim shumë të thjeshtë dhe të qartë.
Ai e deklaroi veten komunist por “jo në kuptimin e vjetër marksist” dhe ishte shumë fetar. Ai e përkufizoi veten si “homoseksual dhe i krishterë” dhe konsiderohej një pararendës i çështjeve LGBT.
Përveç profesorit në Universitetin e Torinos, ai dha mësim edhe jashtë vendit dhe mori tituj nderi nga universitete prestigjioze ndërkombëtare.
Ai ishte gjithashtu anëtar i Parlamentit Evropian për dy legjislatura, fillimisht me demokratët e majtë në 1999 dhe më pas me Italia dei Valori të Di Pietro-s në 2009 dhe kontribuoi në përhapjen e filozofisë duke drejtuar programe televizive në TV./ S.M
