E mbani mend periudhën e artë të lulëzimit të rrjeteve sociale, si Facebook apo Instagram? Dy realitete të reja teknologjike që ridimensionuan kodet e deriatëhershme të komunikimit dhe që vinin në pah anën e bukur të së përditshmes të gjithësecilit, foto e video ku çdo gjë dukej thjesht në vendin e duhur. Kohët kanë ndryshuar dhe tanimë njerëzit i përdorin rrjetet sociale për të denoncuar probleme të ndryshme, por edhe për të ndarë eksperiencat e tyre.
Për shembull, influencuesja gjermane Theresia Fischer nuk e kishte menduar kurrë që do të gjente forcën të rrëfente në Instagram, historinë e saj. 31-vjeçarja ka treguar para mijëra ndjekësve, atë që e quan gabimin e saj më të madh, operacionet për zgjatjen e këmbëve, të cilat i bëri pasi ish-bashkëshorti, nga i cili u nda në shtator të 2022-shit, ia kërkonte me ngulm.
“Ti e di që më pëlqejnë gratë e gjata. Do të doja akoma më shumë, nëse do të më kënaqje. Ke gjithçka që kam kërkuar te një partnere, por duhet të zgjatesh akoma më shumë”,-është ky refreni i përditshëm që shoqëroi 8 vitet e martesës se Fischer, e cila shprehet se dhuna e vazhdueshme psikologjike ishte ajo që e çoi drejt dismorfofobisë, njohur ndryshe si urrejtja ndaj vetes.
“I dëgjoja këto fjalë 30, 40, madje 50 herë në ditë dhe nuk më ngeli veçse t’i bindesha. Toksiciteti i tij ishte më i fortë se çdo gjë tjetër. Tani më vjen turp sepse rashë dakord për një operacion që nuk duhej ta kisha bërë. Ai ishte një narcisist që më ndau nga familja.”, -vijon ajo.
31-vjeçarja iu nënshtrua operacionit të parë, kur ishte 24-vjeç, kurse të fundin e bëri në korrik të vitit të shkuar. Theresia shpjegoi se operaciont komisionin në thyerjen e tibias, kockës më të gjatë të gjymtyrëve të poshtme, dhe zgjatimin e disa fijeve të indit muskulor. Para ndërhyrjeve ajo ishte 170 cm e gjatë, kurse sot është plot 184 cm. /kb
