Përfundon numërimi i 74 kutive të votimit në Kukës, raporton gazetarja Erneta Shevroja. Albert Halilaj i PS-së shpall fitoren me 13 026 vota kundrejt rivalit opozitar, kandidatit të koalicionit ‘Bashkë Fitojmë’, Emri Vata që ka marrë 7429 vota. Kandidati socialist triumfon me 5597 vota diferencë nga kundërshtari Vata.
327 vota kanë rezultuar të pavlefshme. Halilaj ka tejkaluar edhe rezultatin e Safet Gjicit në14 Maj, duke marrë 1403 vota më shumë. Më herët, teksa po numëroheshin dy kutitë e fundit, Halilaj në një prononcim për mediat falenderoi qytetarët kuksianë për besimin e dhënë.
“Falenderoj të gjithë qytetarët për kulturën që treguan, votëbesimin iu premtoj që do t’i përfaqësoj denjësisht gjatë katër viteve me punë, përkujdesje dhe prani pranë çdo qytetari. Jam i zonës së Kukësit, kam punuar për vite në administratë, jam njeri i thjeshtë, pa bindje partiake do të jem krah çdo banori të Kukësit. Premtimi i pare që iu bëj është prezenca ime në lidhje me inbvestimet në infrastrukturë. Qeveria Rama do të jetë prezent në çdo skaj të Kukësit për të përmirësuar çdo problem në lidhje me infrastrukturën. Kam një sërë projektesh për t’i ardhur në ndihmë Kukësit në lidhje me papunësinë, për të zhvilluar turizmin, për t’i dhënë një promovim tjetër Kukësit të lënë pas dore.”, theksoi ai./I.S
