Një ngjarje e rëndë ka ndodhur në Tiranë pasi një foshnje 9-ditëshe ka ndërruar jetë. Kanë qenë pikërisht prindërit e foshnjes që kanë denoncuar rastin në Prokurorinë e Tiranës.
Ata kanë kallëzuar drejtoreshën e QSUT-së Albana Fico dhe drejtoreshën e Maternitetit “Mbretëresha Geraldinë” Eliona Demaliaj.
Sipas prindit A. D foshnja lindi pa asnjë problem dhe se erdhi në jetë me peshë rreth 4 kg. Por orë pas lindjes u konstatua se fëmija kishte probleme me oksigjenimin ku pas ekzaminimeve u kontrollua zemra.
Kontrollet nxorën përfundimin se foshnja ishte me Transpozicion të enëve të mëdha të aortës së zemrës.
“Mjeku më tha që duhej bërë ndërhyrje e menjëhershme kirurgjikale koronare për zgjerimin e venave me qëllim lehtësimin e qarkullimit të oksigjenit në trupin e fëmijës.
Çdo minutë që kalonte, rrezikonte jetën e fëmijës dhe ndërhyrja ishte urgjente”, thotë në kallëzim babai i foshnjës.
“Mu sugjerua se ilaçi për trajtim nuk gjendej në sektorin publik, dhe se duhej të kërkoja privatisht” shton ai, teksa emri i ilaçit ishte Alprostoglandinë PGE 0.5 mg.
Sipas babait të foshnjës ilaçi disponohej nga një spital privat në Tiranë, aty ku përtej kostove të larta, arriti të siguronte 5 copë.
Sipas tij është detyrë e shtetit të sigurojë këtë medikament për foshnjat me këto komplikacione.
Mjekët me të cilët babai diskutoi lidhur me këtë problem i sugjeruan që operacionin ta bënte jashtë vendit (Itali), ku kostoja shkonte mbi 40 mijë euro.
Ndryshe t’i drejtohej fondacioneve që asistojnë për raste të tilla.
Megjithëse u arrit të kryhej një operacion në QSUT, në kushtet kur nuk u gjet rrugë tjetër dhe jo në kushtet e duhura, foshnja ndërroi jetë vetëm një ditë më pas (25 gusht 2023)./ S.M
