Teksa projekti për Aeroportin e Vlorës po avancon, edhe zona përreth tij pritet të marrë tjetër zhvillim.
Operatori i Sistemit të Shpërndarjes ka vlerësuar se nevoja për zhvillimin e një linje të re të furnizimit me energji për këtë aeroport por dhe për zonën rreth saj është i nevojshëm dhe për këtë ka hapur një procedurë që parashikon linjën 35 kilovolt.
Konkretisht bëhet fjalë për një linjë nga 35 kilovolt në Mifol në Aeroportin e Vlorës.
Zona e projektit shtrihet në pjesën jugperëndimore të Shqipërisë. Novosela është qendra kryesore e zonës pranë autostradës Levan-Vlorë dhe është rruga kryesore që lidh këto zona me qytetin e Vlorës.
Ndërtimi i Aeroportit Vlorë është një investim i rëndësishëm pasi rrit aksesin e turisteve për në bregdetin e Jugut të Shqipërisë.
Për furnizimin me energji elektrike të Aeroportit Vlorë duhet zhvilluar një infrastrukturë elektrike e përshtatshme, që të garantojë një shërbim cilësor kundrejt zhvillimit dhe pritshmërive afatgjata te zonës. Projekti përmban linjën e tensionit 35 kV kabllore te dedikuar për furnizimin e Aeroportit Vlorë”, thuhet në relacionin teknik të procedurës. Fondi limit për këtë është 59 milionë lekë.
Aeroporti i Vlorës
Në fillim të vitit 2021 qeveria shpalli fituesin për koncesionin e Aeroportit të Vlorës me një ofertë investimi 103 milionë euro ku bënin pjesë dy kompani Mabco Constructions SA e investitorit Behgjet Pacolli dhe ortaku turk YDA Insaat Sanayi ve Ticaret. Në dhjetor të 2022-it Mabco mori kontrollin e plotë të aksioneve.
Qeveria ka aplikuar për këtë projekt garantimin e trafikut të munguar.
Sipas dokumenteve të bëra publike në atë kohë të ardhurat e garantuara në skenarin bazë për 10 vitet e para të operimit parashikohen 9.6 milionë euro në vitin e katërt, 10.3 në vitin e pestë, 11.2 për të gjashtë, 12.1 për të shtatë e kështu me radhë me një kulmim prej 18.6 milion euro në vitin e trembëdhjetë nga nënshkrimi i kontratës.
Në total të ardhurat e garantuara duhet te jenë rreth 138 milionë euro. Kontrata parashikon që aeroporti të përfundojë në vitin 2024 dhe të nisë operimin në vitin 2025./ S.M
