Drejtoria e Përgjithshme e Shërbimit të Transportit Rrugor reagoi sot ndaj një shkrimi të publikuar në revistën “Monitor”, mbi ndikimin e mjeteve të transportit rrugor në cilësinë e ajrit.
DPSHTRR thekson se raporti i KLSH-së, së cili i referohet “Monitor” është i pasaktë, duke bërë lajm të gabuar.
Lidhur me të dhënat e raportit se gjatë periudhës 2015-2022, ka pasur një shtim të konsiderueshëm të numrit të mjeteve rrugore që përdorin naftën, DPSHTRR sqaron se “sasia e mjeteve me lëndë djegëse naftë kundrejt totalit në vitin 2022, ishte 71% e totalit (565,955 mjete nga 796,445 mjete total), sikurse ishte 71% edhe në vitin 2015 (369,379 mjete nga 521,773 mjete total)”.
“Raporti i KLSH-së që citohet nga Revista Monitor, konstaton se: “Rritja e flotës së mjeteve rrugore me 100,000 automjete me moshë mesatare më të madhe se 20 vjet, rrit gjithashtu numrin e mjeteve rrugore me kategori mjedisore “Euro 0”, “Euro 1”, “Euro 2” dhe “Euro 3” thuhet në Raport. Nuk ka se si rritet numri i mjeteve Euro 0, 1, 2, kur prej vitit 2018 ndalohet kategorikisht importi i tyre! Edhe për kategorinë Euro 3, është ndaluar importi për mjetet Autovetura, që përbëjnë pjesën dërrmuese të regjistrimeve të reja”, thuhet në reagimin e DPSHTRR-së.
Sipas DPSHTRR-së, viti i prodhimit mesatar i flotës së mjeteve në vitin 2015 ishte viti 1998, ndërkohë që në vitin 2022 ishte viti 2004, me një rinim prej 6 vitesh.
DPSHTRR thekson se aktualisht ka një rekord të daljes nga qarkullimi të mjeteve rrugore të vjetra e ndotëse, +48% krahasuar me vitin 2021.
“Kemi rekord të uljes së ndotjes si rezultat i një Kontrolli Teknik shumë më pedant. Import të kufizuar, Euro 4 e lart për Autoveturat e përdorura dhe Euro 5, 6 e lart për Autoveturat e reja! 15 vjet e poshtë vjetërsi për Autobus e Kamionë të përdorur, Euro 5 e lart kur këto mjete importohen të reja. TVSH 0 për Automjetet e reja All Electric dhe 0 tarifa shërbimi për to. Rekord regjistrimi mjetesh rrugore All Electric, 17% e totalit të mjeteve të reja, kur Gjermania e ka 22.5 %, MB 17%, Franca 16.7%, Spanja 5.2% e Italia 3.9% të totalit”, thekson DPSHTRR.
Sipas DPSHTRR-së, “54% e mjeteve rrugore që regjistrohen janë Euro 5 e lart, ose +83% krahasuar me vitin 2021”.
“Mbi 41% janë mjete rrugore të gjeneratës së fundit, 0-3 vjet, krahasuar me vitin 2021. Kemi rekord regjistrimi mjetesh rrugore All Electric + Hybrid me 31% të totalit të regjistrimeve të mjeteve të reja. Rinim dhe përmirësim flote vendase. Moshë mesatare flote 17.5 vjet, kur Greqia e ka 17 vjet, Bullgaria 20 vjet, Maqedonia e Veriut 19.4 vjet, si vend pa industri prodhimi automobili dhe në kohë krize globale e me tranzicionin tonë post diktaturë”, thekson DPSHTRR.
Po ashtu, në njoftim thuhet se gjatë 3 viteve të fundit, mesatarja e moshës së mjeteve rrugore të regjistruara në total është 12 vite./ S.M
