Alma Bektashi deklaroi publikisht se ish-bashkëshorti nuk është i pranishëm në jetën e fëmijëve të saj. Në një intervistë për “Ora e pasdites” në Klan Kosova, këngëtarja u pyet për divorcin dhe preferoi të mos ndalej në detaje.
“Sa i përket divorcit tim, nuk do të flisja për dikë që ka kohë që është inekzistent në jetën time dhe të fëmijëve të mi. Jam një nënë që gjatë gjithë kohës i përkushtohem fëmijëve të mi. Kemi një marrëdhënie fantastike. Jemi si tre shokë që jetojmë në një banesë, por secili në dhomën e vet,” u shpreh ajo.
Në vijim, Alma u ndal te tema e divorcit në shoqërinë shqiptare dhe vështirësitë që hasin gratë e divorcuara.
“Ajo që më shqetëson më shumë tek femrat e divorcuara është që s’kanë mundësinë, nuk gjejnë përkrahje as tek familja, as tek njerëzit që i rrethojnë as te miqtë, askund. Kjo është në kulturën tonë. Më vjen keq, ndoshta jam pak e vrazhdë në këtë aspekt, por kultura fillon nga prindërit. Ju e keni parë që gjithmonë lindin pesë, gjashtë apo shtatë, tetë a nëntë vajza vetëm për të dalë një djalë. Pastaj kur fillojnë të rriten, vajzave u jepet ujë e djalit qumësht, se është vetëm një djalë. Diskriminimi fillon prej nënës dhe babait.”
Dy vite më parë, Alma Bektashi iu drejtua gjykatës së Tiranës për t’i dhënë fund martesës 25-vjeçare me Sokol Stafën. Asokohe, media të ndryshme raportuan se shkak ishte bërë një lidhje jashtëmartesore e Stafës me një psikologe divorcesh, 20 vite më të re se ai.
Ishin miqtë e përbashkët që fillimisht e zbuluan tradhtinë kur panë Instagramin e psikologes, e cila i deklaronte publikisht dashurinë burrit të Almës, ndërkohë që ata ishin ende të martuar, raporton Panorama Plus. Burime të sigurta për Panorama Plus treguan se dhe vetë Alma kishte mësuar për tradhtinë nga kjo mënyrë e daljes hapur në rrjetet sociale.
Alma Bektashi dhe Sokol Stafa janë prindër të dy fëmijëve, vajzës Anisa dhe djalit Orest./E.Ç
