Me gjithë se ka një kundërshtim të fortë nga Kisha Ortodokse greke, qeveria e kryeministrit Mitsotakis ka njoftuar se do të zbatojë premtimin e saj për legalizimin e martesës së personave të të njëjtës gjini.
Zëdhënësi i qeverisë, Pavlos Marinakis, ka deklaruar se legjislacioni do të sillet në parlament brenda mandatit aktual deri në vitin 2027, megjithëse mediat përcaktojnë si periudhë më të mundshme, kohën pas zgjedhjeve për Parlamentin Europian në qershor të vitit që vjen.
Njoftimi i qeverisë vjen pas një deklarate prej 1500 fjalësh nga Sinodi i Shenjtë, ku shprehet kundërshtimi i fuqishëm ndaj legalizimit të këtyre martesave: Argumenti kryesor i paraqitur nga Kisha sillet rreth shqetësimeve për fëmijët që rriten në familjet e çifteve homoseksuale, për të cilat Kisha pretendon se i shohin fëmijët si “aksesorë” apo si “kafshë shtëpiake shoqëruese” .
Pavlos Marinakis, zëdhënës i qeverisë greke: “Ne gjithmonë dëgjojmë me respekt mendimet e Kishës dhe të Sinodit të Shenjtë, por në të njëjtën kohë ne po zbatojmë politikën tonë dhe do të dëgjojmë pikëpamjet e shoqërisë, shoqërisë civile, qytetarëve, institucioneve dhe partive në tërësi; Ajo që do të them, pa u marrë si përgjigje, është se duhet të mendojmë gjithmonë për fëmijët, disa prej të cilëve rriten në rrethana shumë të vështira, rriten në institucione.”
Kisha greke thekson gjithashtu se nëse të drejtat e martesës zgjerohen, do të ketë një detyrim ligjor të mëvonshëm për t’u dhënë të drejtat prindërore çifteve homoseksuale në përputhje me marrëveshjet ndërkombëtare që Greqia ka ratifikuar. Ndaj pohon me vendosmëri se fëmijët kanë të drejtën për t’u rritur si nga një baba mashkull ashtu edhe nga një nënë femër.
Ndërsa grekët vetë janë të ndarë për këtë çështje, kundërshtime për projektligjin në fjalë kanë shprehur përveç partive të ekstremit të djathtë, edhe shumë zyrtarë të lartë të partisë konservatore Demokracia e re. Kujtojmë se lideri i partisë më të madhe opozitare Syriza, Stefanos Kaselakis, u martua vetëm para disa javësh me partnerit e tij prej vitesh, Tyler McBeth./O.S
