Alexei Navalny, i cili mbahet në një burg në Arktik, u vendos në izolim për 10 ditë. Dhe kjo, pasi siç tha përfaqësuesi i tij, ai nuk e ka deklaruar emrin e tij në mënyrën e duhur te një roje. 47-vjeçari ka qenë një kritik i Kremlinit dhe ka ngritur akuza për korrupsion. Tani, ai është transferuar në një burg që ndodhet rreth 60 km në veri të Rrethit Arktik.
Kira Jarmis, zëdhënësja e tij, tha dje vonë në Platformën X se ishte hera e 25-të e Navalny në izolim dhe se ai ka kaluar 283 ditë në kushte të tilla. Ndërkohë, mësohet se ai është futur në izolim, pas pretendimeve se nuk e kishte shqiptuar mirë emrin e tij te roja i sigurisë në burg.
Navalny është dënuar të qëndrojë në burg deri në moshën 74-vjeçare. Ai pohon se akuzat ndaj tij janë të sajuara, me qëllim që ta mbajnë larg jetës politike. Dje, opozitari tha se është i detyruar të dëgjojë një këngëtar pop, mbështetës i Vladimir Putinit, çdo mëngjes në orën 5, para se të dëgjojë himnin kombëtar rus./O.S
