Dhjetëra banorë të fshatrave Povelcë dhe Darëzezë në Fier janë ngritur në protestë për ndotjen e ujit të kolektorit.
Banorët e shqetësuar thonë përveçse e përdorin për vaditje, ujin e ndotur e pinë edhe bagëtitë që shpesh kanë shfaqur probleme shëndetësore.
“Fermerët kanë problem se uji është me kripë dhe i ndotur. Se nga vjen ta gjej shteti të bëjë analiza. Nga kjo po ngordhin bagëtitë”.
“Mua lopa më ngordhi para dy javësh, por ngase ka ndodhur nuk jam doktor”.
“Këtu janë shumë fermerë që mbajnë blegtori. Gjatë gjithë vitit blegtoria këtu pinë urinën dhe janë me probleme shëndetësore”.
Ata tregojnë se i janë drejtuar në mënyrë të vazhdueshme institucioneve vendore, po nuk kanë marrë zgjidhje.
“Ndotja vjen nga stalla e derrave dhe urina e tyre. Kjo situatë është e përsëritur”.
“Shteti të marrë masa, jemi ankuar e kemi folur dhe nuk kemi marrë zgjidhje”. Bimët që kemi mbjell po na thahen. Nuk e di çfarë stallash ka, por uji është i ndotur. Është i gjithi i ndotur. Si fermërë ankohemi se kemi problem me kripën dhe me ndotjen”.
“Kam 200 dele dhe 6 ha jonxhë, kanalet janë të thara, nuk kam me çfarë ta vadis. Ka 20 vjet dhe vjen nga salla e derrave. Detyrohem të marr ujë nga shtëpia për t’ju dhënë bagëtive. Jemi ankuar në bashki, na kanë thënë do ju ndihmojmë dhe asgjë”.
Banorët thonë se ndotja e ujit rrezikon edhe turizmin në këtë pragsezon, pasi uji i ndotur i kolektorit, tërhiqet nga hidrovori i Darëzezës dhe derdhet në det.
“Po na fillon turizmi ne kemi investuar në këtë det, asnjë turist nuk vjen në këtë gjendje që është uji këtu. Në kohën që fillon plazhi fëmijët tanë shkojnë në spital, nga uji i ndotur, i pisët”./e.t
