Një ëndërr që bëhet realitet për sportin shqiptar! Më në fund, edhe flamuri kuqezi do të valëvitet në një podium olimpik!
E jashtëzakonshme, një mrekulli ka ndodhur sot në “Paris 2024”!!!! Për herë të parë në histori, Shqipëria fiton një medalje olimpike.
Një ëndërr që bëhet realitet për sportin shqiptar! Më në fund, edhe flamuri kuqezi do të valëvitet në një podium olimpik!
Këtë gjë e realizoi sot pasdite mundësi Chermen Valiev, që mori medaljen e bronztë në Lojërat Olimpike “Paris 2024”. Ai doli i treti në peshën 74kg, në stilin e lirë.
Një paraqitje e shkëlqyer e mundësit 25-vjeçar shqiptar, rus, por i natyralizuar këtë vit, që nderoi ngjyrat kuqezi, duke i dhënë Shqipërisë medaljen e parë olimpike në histori. Në sfidën për medaljen e bronztë, zhvilluar në “Champs de Mars Arena”, Valiev mundi 6-2 Viktor Rassadin të Taxhikistanit, në një përballje të jashtëzakonshme.
Një sfidë e dominuar nga Valiev, që fitoi 2-0 pas periodës së parë dhe më pas e thelloi epërsinë në periodën e dytë, duke e kontrolluar sfidën dhe merituar fitoren. Në këtë turne, Valiev arriti tri fitore e një humbje. Në raundin e parë, ai mundi 4-3 Turan Bajramov të Azerbajxhanit, ndërsa në çerekfinale u mund 6-5 nga Razambek Jamalov i Uzbekistanit.
Në “ripeshkim”, ai fitoi 12-2 ndaj Mohamedkhabib Kadzimahamedau, rus, por që garonte si neutral. E në fund, “qershia mbi tortë”, fitorja ndaj Rassadin, që i dha medaljen e bronztë.
Kush është Chermen Valiev?
Chermen Akhsarbekovich Valiev ka lindur më 10 dhjetor 1998 në Osetinë e Veriut në Rusi dhe aktualisht është një mundës i stilit të lirë që garon në 74 kilogramë për Shqipërinë.
Për vendlindjen e tij, Rusinë, Valiev ka fituar një titull kampion bote dhe një Evropian për U-23, një kampion kombëtar rus dhe është fitues i shumëfishtë i medaljeve të arit në turnetë ndërkombëtarë.
Që nga transferimi në Shqipëri në vitin 2024, Valiev u kualifikua për të përfaqësuar Shqipërinë në Lojërat Olimpike Verore në Paris, duke u renditur i treti në Turneun Olimpik Botëror të Kualifikimit.
Në dhjetë turnetë e Lojërave Olimpike që Shqipëria ka marrë pjesë, duhej një rus nga Osetia e Veriut që të natyralizohej si kuqezi, për t’i dhënë Shqipërisë medaljen e parë (e bronztë) në historinë e Olimpiadës.
