Pas tetë orësh ka përfunduar takimi mes shefit të Kabinetit Edi Rama me ministrat, drejtorët dhe drejtuesit politikë. Zgjedhjet e vitit 2025, integrimi, dhe komunikimi me median kanë qenë temat ku janë ndalur. Në mënyrë indirekte kryeministri ka vlerësuar disa sektorë, por kritikuar të tjerë, duke u dhënë mesazhin ministrave të linjës se mund të ketë sërish ndryshime në kabinet.
Për tetë orë kreu i Qeverisë Edi Rama mblodhi në rezidencën qeveritare në Dajt ministrat, drejtorët e institucioneve të varësisë dhe kupola drejtuese e Partisë Socialiste në Parlament. Të gjithë këta raportuan për punën e tyre në drejtimin e institucioneve. Fokusi kryesor ishte angazhimi dhe sfida e mazhorancës qeverisëse për zgjedhjet parlamentare të 2025. Të majtëve u është prezantuar një strategji komunikimi në raport me institucionet dhe me publikun përgjatë këtij viti elektoral. Rama ka dëgjuar një pjesë të raportimeve sipas programit të punës, por ndërmjet fjalëve të diskutantëve ka dhënë vlerësimë dhe kritika në raste të ndryshme. Kjo ka qenë një formë “udhëzimi” i kreut të qeverisë që disa ministra duhet të “ndryshojnë kurs”, ndryshe është lënë të kuptohet qartësisht se mund të ketë sërish ndryshime në kabinet, ndonëse zgjedhjet po afrojnë. Përpos politikës së jashtme, një zë të rëndësishëm në këtë “retreat” ka zënë edhe integrimi, si për negociatat për integrimin për të nisur hapjen e kapitujve të parë në vjeshtë, por edhe për vijimin e reformave të brendshme me kusht që të përfitojmë paratë nga Brukseli. Kjo mbledhje është e ndarë në disa blloqe, blloku social ku përfshihet siguria, mbrojtja, blloku i drejtorëve ku do të tregohen prioritetet dhe blloku i komunikimit, i cili është më i rëndësishmi. Sa i takon komunikimit ka qenë Endri Fuga i cili ka orientuar të ftuarit për aktivitetet që duhet të kenë drejtuesit e Partisë Socialiste në rrjetet sociale. Sa i takon bllokun e integrimit, fjalën e ka marrë kryenegociatorja Majlinda Dhuka, çështje e rëndësisshme pritet të mbahet konferenca e dytë qeveritare. Të gjithë ministrat, pas prezantimit të tyre, janë njohur dhe me objektivat që duhet të realizojnë deri ditën e zgjedhjeve të ardhshme parlamentare. Një tjetër pikë ishin edhe objektivat në këtë sesion të ri plenar duke qenë një vit zgjedhor. Vetë Rama ka shprehur mbështetjen për të fituar dhe qeverisur mandatin e katërt. Pas përfundimit të takimit, edhe pse ishte menduar të kishte një deklaratë për media, shefi i qeverisë zgjodhi të largohej së bashku me të ftuarit e tij pa dhënë ansjë prononcim. Më 8 shtator shefi i Qeverisë Edi Rama do të mbledhë Asamblenë e Partisë Socialiste në Durrës. Asambleja e re do te zgjedh kryesinë e partisë dhe sekretariatin. Përbërja e re e Asamblesë së Partisë Socialiste u votua gjatë punimeve të Kongresit të PS-së më 28 korrik të këtij viti në Pallatin e Kongreseve, në të cilin Rama bëri publike dhe ndryshimet në qeveri. Asambleja e re ka rreth 350 anëtarë, ndërsa Kongresi zgjodhi vetëm 156 prej tyre me votën e secilit anëtar, pasi pjesa tjetër zgjidhen automatikisht për shkak të funksioneve drejtuese që mbajnë në nivel qendror dhe lokal. Janë pikërisht këta emra të Asamblesë së PS-së që do të zgjedhin Kryesinë e ardhshme të partisë dhe listën e deputetëve për zgjedhjet e 2025.
