Ish-ministri Beqaj sapo ka ardhur në ambjentet e Kuvendit për të dhënë dëshminë e lënë përgjysëm dje në Komisionin hetimor për Sterilizimin dhe Check up. Ky komision dështoi të marrë dëshminë e Ilir Beqaj ditën e djeshme. Për 9 orë me radhë PD dhe PS debatuan e ngritën tonet deri në ofendime.
Debat i fortë dhe akuza mes PD dhe PS. Më kërkesë të Plarent Ndrecës dëshmia u shty për sot (13 Nëntor), në 10:30.
Ish-ministri i Shëndetësisë u rikhye në Kuvend me pranga në duar rreth orës 10:30 të së martës, 12 nëntor, i rrethuar nga policë, por i kujdesshëm që prangat të cilat i rrethonin duart, t’i mbulonte me xhaketë për t’i shpëtuar syrit të medias.
Ai la burgun pas 4 muajsh, i arrestuar për abuzim me fondet e Bashkimit Europian në SASPAC, për të dëshmuar në komisionin hetimor për 2 koncesionet që janë dhënë në kohën kur ai ishte ministër i Shëndetësisë, ai i check-up dhe sterilizimit.
I përgatitur me dy dosje voluminoze, Beqaj u ul para komisionit me një mosbesim të dukshëm dhe në mënyrë demonstrative, refuzoi shishen e ujit që i ishte vendosur nga shërbimet e Kuvendit dhe nxori nga çanta e tij, dy të tjera, një për të, e një për avokatin që e shoqëronte.
Një kërkesë e Ilir Beqajt për të prezantuar qëndrimet dhe deklaratën e tij përmes materialeve të përgatitura në Power Point, imazhe, audio apo video, dhe refuzimi nga ana e kryetares së komisionit Albana Vokshi, solli ngërçin që e shoqëroi komisionin me debate të forta në orët në vijim, ku nuk munguan as fyerjet e drejtpërdrejta apo indirekte.
Ilir Beqaj: ‘Unë dua të informoj njerëzit se cfarë ka ndodhur. Nuk ka përkufizim ligjor kush është forma e deklaratës…’ tha Beqaj.
Albana Vokshi: Po kërkoni ti jepni të drejtat më shumë se dëshmitarët e tjerë. Nuk është më i mirë se Ilir Rrapaj, Ilir Beqaj. Ilir për Ilir. Deklaratë e vetëm deklaratë e përcakton ligji. Nëse nuk doni, e nis me pyetje’
Në një moment pati replika të ashpra mes Vokshit dhe Beqajt.
Ilir Beqaj: “Jam akuzuar si hajdut nga ju Nuk jam i shkreti. Boll me epitete ndaj meje. Ta kam thënë në 2016 hallin tënd s’ta zgjidh unë.
Albana Vokshi e cila disa herë i drejtohej Beqajt me ‘i shkreti’ e qyqari’ replikoi: Hallet e mija unë I zgjidh vetë. Hallet e tua nuk di si ti zgjidh.
Në debatin dhe replikat mes Vokshit, Beqajt, janë përfshirë dhe deputetët socialistë të cilët thanë se një procedurë e tillë është e pranueshme dhe në gjykatë e nuk ka pse të mos pranohet në komision.
Albana Vokshi: E kuptoj sikletin. S’e nuk e shpëton dot. Doni të bëni konferencë shkencore
Plarent Ndreca: E ke kthyer këtë komision në akuzator. Diskursi yt është helmues.
Debatet u ashpërsuan deri në ofendime për një çështje e cila nuk mori zgjidhje. A duhet ta lejonin Ilir Beqjan të realizonte për herë të parë mbrojtjen e tij publike përmes materialeve audiovizive? Apo duhet t’i qëndronte një deklarate të thjeshtë siç parashikon ligji?
As pas disa ndërprerjesh radhazi në 9 orë diskutime, palët nuk e gjetën gjuhën për mënyrën se si do të dëshmonte Ilir Beqaj. Opozita akuzoi mazhorancën për skenar në mënyrë që të pamundësohej marrja në pyetje e ish-Ministrit të Shëndetësisë.
Albana Vokshi: Është skenar se nuk duan që Ilir Beqaj të flasë. Jemi dakordësuar gjithmonë, hera e vetme që nuk dakordësohemi është sot se ka një mal me zullume ky njeri mbi supe. Ne po ofrojmë të hyjë, boll e lartë të mbyllur.
Plarent Ndreca: Unë skam planifikuar asgjë, skam lidhje me këtë gjë. S’kam asnjë skenar dhe as nuk ja kam idenë. Ajo që po të them është që pyetjet përgjigje nuk ti kemi vënë në diskutim.
Plarent Ndreca: Ca frike ke nga power point
Albana Vokshi: Të fillojë ta lexojë si deklaratë.
Pushimet e gjata për të qartësuar qëndrimet nuk bënë punë dhe palët u rikthyen sërish me akuza ndaj njëri tjetrit.
Plarent Ndreca: Je bolshevike, ke formim bolshevik
Albana Vokshi: Ti je vjen nga partia komuniste, unë vi nga PD.
Plarent Ndreca: Ti mund te vish nga PD, po aty ka bolshevik, dhe një nga ato je ti. Je kthyer në drejtuese hitlerjane që do ti imponohesh komisionit. Do të bësh hetimi gestapoje. S’ke për t’iu imponuar vullnetit të shumicës. Jemi të vendosur që Beqaj të flasë të vërtetën që ai mendon. Ti ke frikë nga power point i tij.
Orët e gjata në debat duket se i lodhën dhe dakordësinë e gjetën vetëm për një gjë, shtyrjen e seancës për të mërkurën në orën 10:30. Sekretarisë iu la dje detyrë që t’i drejtohej me një kërkesë Drejtorisë së Burgjeve, për të marrë lejen për të pyetur Beqajn ditën e sotme. S.B
