Donald Trump ka konfirmuar se miliarderi Elon Musk do të bashkë-drejtojë departamentin e ri për efikasitetin e qeverisë, pasi emëroi mikpritësin e Fox News dhe veteranin e Gardës Kombëtare Pete Hegseth si Sekretar të Mbrojtjes.
Sipas mediave të huaja, Presidenti i zgjedhur tha të martën se Musk, pronari i Tesla dhe rrjetit social ‘X’, i cili është gjithashtu njeriu më i pasur në botë, do të punojë me ish-kandidatin presidencial republikan Vivek Ramaswamy për të udhëhequr departamentin, i cili njihet shkurt si DOGE.
Ky entitet, sipas Presidentit Donald Trump, do të operojë jashtë ekzekutivit amerikan.
Përmes një deklarate, Trump tha se Musk dhe Ramaswamy, “do t’i mundësojnë administratës sime që të zhdukë burokracinë qeveritare, që të zvogëlojë numrin e rregulloreve të tepërta, që të shkurtojë shpenzimet e kota dhe që të ristrukturojë agjencitë federale”.
Trump tha se ky departament i ri do të realizojë ëndrrat e kamotshme të republikanëve dhe do të ofrojë “këshilla dhe udhëzime nga jashtë Qeverisë”, duke sinjalizuar se rolet e Muskut dhe Ramaswamyt mund të jenë joformale dhe nuk do të ketë nevojë për miratimin e Senatit për emërimin e tyre. Një gjë e tillë do t’i mundësonte Muskut që të mbeste në krye të kompanisë së tij për makina elektrike, Tesla, të platformës sociale X, dhe të kompanisë së raketave, SpaceX.
Ndërkohë, zgjedhja e zotit Trump për Hegseth si sekretarin e tij të Mbrojtjes erdhi si befasi për shumë njerëz, me kritikët që vunë në dukje mungesën e përvojës së tij dhe vunë në dukje kundërshtimin e tij ndaj ideve të “zgjuara” që promovojnë barazinë dhe përfshirjen.
Hegseth më parë tha se burrat dhe gratë që shërbejnë së bashku “e bëjnë situatën më të komplikuar” dhe se ndërsa diversiteti në ushtri është një forcë, ai tha se kjo ndodh për shkak se burrat e pakicave dhe të bardhët “mund të performojnë në mënyrë të ngjashme”, por e njëjta gjë nuk është e vërtetë për gratë.
Emërimi i Musk përmbush një premtim që zoti Trump i bëri miliarderit të teknologjisë pasi ai e mbështeti atë në garën për Shtëpinë e Bardhë dhe derdhi më shumë se 119 milion dollarë në fushatë(92 milion £).
Në një deklaratë, presidenti i zgjedhur tha se Musk dhe Ramaswamy “do t’i hapin rrugën administratës sime për të çmontuar burokracinë qeveritare, për të ulur rregulloret e tepërta, për të shkurtuar shpenzimet e kota dhe për të ristrukturuar agjencitë federale”.
Musk e ka bërë të qartë më parë dëshirën e tij për të reduktuar “mbeturinat qeveritare” dhe në një postim në platformën e tij X sugjeroi se ai mund të shkurtojë deri në tre të katërtat e më shumë se 400 departamenteve federale në SHBA, duke shkruar: “99 është mjaft”.
Në një postim të veçantë ai shkroi: “Kërcënim për demokracinë? Jo, kërcënim për burokracinë”.
Në një varg zgjedhjesh për administratën e tij të dytë, Trump tha gjithashtu se do të emëronte ish-drejtorin e inteligjencës kombëtare John Ratcliffe për drejtor të CIA-s./e.t
