Janë ende shumë të rinj, por tepër të rrezikshëm. Yjet e Barcelonës ndoshta nuk e kanë ende pjekurinë e duhur për të sfiduar një Real në kampionatin e dytë më të fortë në botë, por po shkëlqejnë fort në çdo drejtim tjetër.
Pak ditë pas fitores së jashtëzakonshme 5-2 ndaj madrilenëve në finalen e Superkupës së Spanjës, katalanasit arritën një tjetër sukses të madh dhe një kualifikim. Triumf 5-4 në Portugali ndaj Benfikës vendase, duke siguruar kalimin në të tetat e finaleve të Championsit.
Në një përballje vërtet të çmendur, “blaugranët” u ndodhën në humbje 1-3, pas tre golave të grekut Vangjelis Pavlidis për vendasit, por pastaj treguan gjithë karakterin. Robert Levandovski dhe Rafinja shënuan nga dy herë, polaku që të dy golat me penallti, ndërsa fitorja u sigurua në minutën e gjashtë shtesë.
Barça u paraqit padyshim shumë më mirë, të paktën ishte ajo që bëri lojën, me 22 gjuajtje gjithsej e 11 në kuadrat, dyfishin e Benfikës. Zotërimi i topit ishte në nivelin thuajse të pamenduar 75 për qind, por këtë herë stili I trajnerit Hansi Flik u duk më shumë si “tiki taka” sesa si sulmi i tij vertikal.
Gjithsesi, talenti në fushë ishte i madh me Pedrin e Gavin, me Rafinjën, Levandovskin dhe Laminë Jamalin. Në fund fare, golin e fitores e realizoi Erik Garsia, i cili hyri nga stoli, ashtu si Ferran Torres, Fermin Lopez apo De Jong. Trajneri Flik nxorri këtë përfundim.
“Gjëja më e rëndësishme është koha. Ne kemi nevojë për kohë që të arrijmë formën e duhur. Fitorja është e rëndësishme, dhe ajo na jep kohë që të vazhdojmë të punojmë, për t’u përmirësuar. Kjo fitore me përmbysje na ndihmon shumë në ditët e ardhshme për t’i përgatitur mirë ndeshjet. Është tepër e rëndësishme për lojtarët, për anën e tyre psikologjike që e arritëm këtë fitore. Po ashtu, që jemi në pjesën e sipërme të renditjes. Natyrisht pati gjëra që nuk më pëlqyen, por ne u treguam të fortë mendërisht dhe kjo më jep shpresë për ndeshjet e ardhshme”.
“Delir”, titullon “El Mundo Deportivo”: Ndeshje e çmendur në “Da Luz”, Barça po humbte 2-4 në 68’, por shënoi tre gola!
“Prej të çmendurish, – është vlerësimi I të përditshmes “Sport”, gjithashtu në Katalonjë, – përmbysje e jashtëzakonshme e Barçës! Ekipi tregoi shpirtin dhe zemrën e kampionëve!”
Ky ishte rezultati i parë 4-5 në historinë e Championsit. Barcelona është në vend të dytë me 18 pikë, lënë pas vetëm nga Liverpuli me 21 pikë të plota./K.K
