Ndryshe nga disa javë më parë, Agron Duka po rimendon rikthimin për të kandiduar për deputet në listat e Partisë Demokratike.
Kryetari i Partisë Agrare Ambientaliste tha për ABC News se po shqyrton mundësinë për të garuar në listë të hapur, me kërkesë të bazës.
“ Jua thash ka kërkesa për shkak se në takimet e fundit që janë shpeshtuar për shkak të fushatës zgjedhore, shpesh më thonë që kontributi juaj duhet të jepet direkt për të mbledhur bota për opozitën, në një farë mënyre kjo ka sens. Do mundohem të jem jashtë kësaj, gjithësesi do shohim. Një gjë është e sigurtë që në listat e mbyllura do jenë të rinj”
Duka pretendon se ka një marrëveshje në parim me Berishën, për 1 apo 2 kandidatë në listë të mbyllur, por firma do të hidhet pas primareve.
“Kështu që marrëveshje me gojë unë kam, që do të kem 1 deri në dy në lista të mbyllura do biem dakord një në Durrës patjetër, është qarku që kemi më shumë ndikim. Dhe nga një në cdo qark në listat e hapura, përvec Kukësit edhe Gjirokastrës që janë qarqe me shumë pak kandidatë për deputetë dhe nuk e shoh të udhës që ne të këmbëngulim”
Megjithatë, Duka pranon se sistemi elektoral është e vetmja aksiomë që e bashkon me Berishën, kurse drejtësia e ndan totalisht.
“Dhe mua më bashkon Kodi, sic më ndan edhe më bashkon. Më ndan se unë kam votuar kundra Kodit, por më bashkon se nuk shoh rrugë që ne të jemi parti parlamentare nëse dalim nga ky grupim. Ndaj jemi detyruar të bashkohemi me grupin e PD, me grupimin e Berishës. Sa i përket drejtësisë, këtu ndahemi”
Kjo është arsyeja sipas tij, pse ka refuzuar koalicionin e disidentëve të PD, Shehi-Basha-Alibeaj. Për Dukën, grupimet me pak parti nuk fitojnë dot mandate. Por tabloja nuk është në favor të PD, e cila në ndryshim nga 2021 ka humbur disa aletatë, ndërsa në radhë pas Berishës, qëndrojnë vetëm Mediu, Dule e Duka./E.T
