PD ka propozuar ndryshime në ligjin e Gjendjes Civile, duke përcaktuar ligjërisht “gjininë biologjike të pandryshueshme”. Demokratët argumentojnë se projektligji synon të mbrojë familjen tradicionale dhe të ndalojë çdo ndryshim ligjor të gjinisë pas lindjes. Nisma bazohet në një vendim të ngjashëm të ish-presidentit Donald Trump, duke rikthyer debatin mbi identitetin gjinor në Shqipëri. Shoqëria civile dhe kundërshtarët politikë e shohin si një kufizim të të drejtave individuale.
Partia Demokratike ka dorëzuar në Kuvend një projektligj që synon të sanksionojë ligjërisht ekzistencën e vetëm dy gjinive në Shqipëri: mashkull dhe femër. Nisma, e firmosur nga 28 deputetë demokratë, propozon shtimin e një neni të ri në ligjin për Gjendjen Civile, duke përcaktuar se gjinia biologjike e një individi mbetet e pandryshueshme që nga lindja. “Në Republikën e Shqipërisë, në kuptimin e këtij ligji, ka vetëm dy gjini njerëzore, gjinia mashkull dhe gjinia femër, dhe mbeten të pandryshueshme,” thuhet në nenin e ri që PD propozon të përfshijë në ligjin ekzistues.
PD mbështet modelin e Trumpit
Projektligji i demokratëve duket se ka marrë shkas nga një vendim i ngjashëm i ish-presidentit të SHBA, Donald Trump. Në ditën e parë të mandatit të tij të dytë, Trump firmosi një urdhër ekzekutiv që hoqi nga përdorimi të gjitha përcaktimet gjinore përveç “mashkull” dhe “femër”. Në relacionin që shoqëron draftin, demokratët argumentojnë se mungesa e një përkufizimi të qartë në ligjin shqiptar ka krijuar një hapësirë që mund të çojë në ndryshime sociale dhe ligjore që, sipas tyre, dëmtojnë strukturën tradicionale të familjes.
Përplasje mbi vlerat dhe identitetin gjinor
PD e justifikon këtë propozim si një përpjekje për të mbrojtur familjen tradicionale dhe për të shmangur, siç thuhet në dokument, “tendencat për të shtrembëruar vlerat shoqërore”. “Kërkohet të na sillet si diçka normale dhe perëndimorizuese ndryshimi i gjinisë së të rriturve apo të fëmijëve, duke i hapur rrugë praktikave që cënojnë institucionin e martesës, adoptimit dhe surrogacisë,” thuhet në relacionin e PD. Nga ana tjetër, kjo nismë pritet të nxisë debate të forta mes aktorëve politikë dhe shoqërisë civile, të cilët në të kaluarën kanë kundërshtuar përpjekje të ngjashme duke i cilësuar si kufizuese ndaj të drejtave individuale.
