Kuvendi i Shqipërisë mblidhet sot në seancën plenare, ku në rendin e ditës janë dy akte normative të Këshillit të Ministrave që synojnë lehtësimin e votimit për shqiptarët që jetojnë jashtë vendit. Aktet parashikojnë shtyrjen e vlefshmërisë së letërnjoftimeve dhe pasaportave të skaduara deri më 31 maj 2025, për t’u mundësuar emigrantëve pjesëmarrjen në zgjedhjet parlamentare të 11 majit.
Me miratimin e kësaj mase, shtetasit shqiptarë me dokumente të skaduara mund të regjistrohen në platformën PER deri më 4 mars dhe të ushtrojnë të drejtën e votës me postë.
Po ashtu, pritet të miratohet një shtesë prej 80 punonjësish me kohë të pjesshme në Komisionin Qendror të Zgjedhjeve për të përballuar fluksin e regjistrimeve dhe administrimin e votave nga diaspora.
Në këtë seancë, Kuvendi do të shqyrtojë edhe projektvendimin për zgjedhjen e Komisionerit për Mbrojtjen nga Diskriminimi./ S,M
