Kryeministri Edi Rama ka zhvilluar sot një takim me asambletë socialiste të njësive 8, 9 dhe 11 në Tiranë, ku u ndal te reforma në drejtësi dhe sfidat e sistemit gjyqësor në Shqipëri.
Gjatë fjalës së tij, Rama theksoi se objektivi kryesor i Partisë Socialiste nuk ka qenë thjesht mbajtja e pushtetit, por ndërtimi i një drejtësie të pavarur dhe integrimi i Shqipërisë në Bashkimin Evropian.
“Në këtë proces ka gjëra që nuk shkojnë fare, por për pesë vite kemi shtrënguar dhëmbët dhe kemi mbyllur gojën për të garantuar pavarësinë e drejtësisë. Ama nuk mjafton vetëm pavarësia, duhet edhe profesionalizmi dhe standardi demokratik,” tha Rama.
Ai u shpreh kundër arrestimeve pa gjyq dhe theksoi se reforma duhet të garantojë një sistem drejtësie me standarde evropiane, duke e ndarë atë nga praktikat që, sipas tij, ngjasojnë me ato ruse.
“PS ka dy mandate që qeveris e vetme dhe i thotë drejtësisë: dil e pavarur, ha trupin tim, s’ka problem. Rëndësi ka që të gjithë të bëhen të barabartë para ligjit. Por kafshimet gabim të drejtësisë janë tragjedi,” tha kryeministri.
Duke përmendur parimet bazë të demokracive perëndimore, ai kujtoi se në një sistem të drejtë, barra e provës i takon akuzuesit dhe të gjithë janë të pafajshëm derisa të provohet e kundërta./e.t
