Drejtuesi i Partisë Mundësia, Agron Shehaj, në një prononcim për mediat komentoi përfundimin e procesit të votimit dhe nisjen e hapjes së kutive për tu numëruar votat për zgjedhjet parlamentare të 11 Majit.
Agron Shehaj tha me bindje se nëse një parti e re do të marrë një mandat, ajo do të jetë Partia Mundësia. Sakaq, Shehaj tha se jetojmë në një vend ku pritet të ketë tentativa për të manipuluar votat.
“Sondazhet thonë që jemi partia e tretë në gjithë Shqipërinë. Jemi shumë më lart në Tiranë se në qarqe. Presim kudo.
Nëse një parti e re do marrë një mandat, ajo do jemi ne. Them se është shpejt për të bërë një bilanc të procesit të votimit ndërsa numërimi sapo ka filluar.
Numërimi është i rëndësishëm. Shpresoj që partitë që kontrollojnë procesin mos të bëjnë numra.
Kemi vëzhgues në të gjitha qendrat e numërimit. Jetojmë në një vend ku presim që të ndodhin tentativa për të manipuluar vullnetin e qytetarëve.”-tha Shehaj.
Ndërsa kreu i “Nismës Shqipëria Bëhet”, Adriatik Lapaj, u shpreh se do të flasë pasi të numërohen kutitë ndërsa shtoi se do të kenë një rezultat shumë të mirë në të gjithë vendin.
“Do më thërrisni prapë nesër në darkë dhe do më thoni që kishte të drejtë. Do jem në të gjitha KZAZ-të e Tiranës.”-tha Lapaj. m.p.
