Në një mëngjes të freskët pranveror në bjeshkët e Dragashit, në jug të Kosovës, tingulli i fyellit përshkon kullotat alpine.
Është Halil Disha nga Novoseja e Kukësit, i cili ka jetuar gjithë jetën mes bagëtive dhe tingujve të fyellit. 70-vjeçari tregon për Report tv se para disa vitesh u zhvendos në Paskuqan të Tiranës, por nuk e gjeti veten ndaj është kthyer në malësi. Prej një muaji punon çoban në Dragash të Kosovës, ku ruan tufën me 180 dele.
Edhe Fitim Krasniqi nga fshati Orçikël i Kukësit është punësuar në Dragash. 30-vjeçari ka provuar emigrimin dhe është kthyer për t’iu përkushtuar bujqësisë.
Fitimi ndan shqetësimin për largimin e të rinjve nga fshati. Zona e Kukësit ka një potencial të jashtëzakonshëm për blegtori por numri i krerëve po bie çdo vit. Pagat për çobanët në Kukës nuk kalojnë 400 euro në muaj ndërsa në anën tjetër të kufirit, në Kosovë arrijnë deri në 700 euro. m.p.
