Deputeti arabo-izraelit Ayman Odeh u përjashtua me forcë nga foltorja e Knesset-it pas një fjalimi të zjarrtë në të cilin kritikoi ashpër ndërhyrjen ushtarake të Izraelit në Gaza. Ai kaloi disa minuta duke dënuar veprimet e ushtrisë izraelite, duke theksuar numrin e madh të viktimave dhe mungesën e arritjeve politike.
“Pas më shumë se një viti e gjysmë lufte, në të cilën janë vrarë mijëra fëmijë dhe dhjetëra mijëra civilë, keni rrënuar institucione arsimore si universitetet dhe prapëseprapë nuk keni arritur asgjë politikisht. Për këtë arsye keni humbur çdo arsyetim,” tha ai mes reagimeve të ashpra nga deputetët e tjerë.
Pas përjashtimit nga salla, Odeh reagoi në rrjetin social “X”, duke thënë se largimi i tij nuk ndodhi për shkak të shkeljes së rregullave të Kuvendit, por sepse ai kishte shprehur një të vërtetë të pakëndshme.
“Nuk më nxorën jashtë sepse theva ndonjë rregull, por sepse thashë të vërtetën. Shtatëdhjetë e shtatë vjet pas Nakbës, bota po sheh një tragjedi tjetër të përmasave të mëdha që po ndodh në Gaza. Mund të më ndalni mua, por nuk mund të heshtni zërin e popullit palestinez, as të ndërgjegjes globale,” shkroi ai./E.T
