Vetëm dy kilometra larg kufirit me Serbinë, sot është përuruar objekti i ri i Stacionit Policor për Mbikëqyrjen e Kufirit në Izvor të Zveçanit.
Në këtë ceremoni morën pjesë kryeministri në detyrë, Albin Kurti, ministri në detyrë i Punëve të Brendshme, Xhelal Sveçla, drejtori i përgjithshëm i Policisë së Kosovës, Gazmend Hoxha dhe drejtori i Agjencisë së Kosovës për Inteligjencë, Petrit Ajeti.
Objekti i ri është ndërtuar me një investim prej 753 mijë eurosh dhe përfshin një sipërfaqe prej afër 3,980 metrash katrorë.
Në këtë stacion do të shërbejë Njësia e Ndërhyrjes së Shpejtë të Kufirit, e cila do të ketë për detyrë garantimin e sigurisë kufitare dhe parandalimin e aktiviteteve ilegale.
Gjatë fjalës së tij, kryeministri Kurti theksoi rëndësinë e krijimit të kushteve të denja për punonjësit e Policisë së Kosovës, duke nënvizuar se ky objekt do të ndikojë ndjeshëm në rritjen e efikasitetit në parandalimin e kontrabandës dhe veprimtarive tjera të jashtëligjshme.
Ai shprehu falënderime për të gjithë aktorët e përfshirë në këtë projekt, përfshirë operatorin ekonomik, Policinë e Kosovës, AKI-në, Ministrinë e Punëve të Brendshme dhe Ministrinë e Administrimit të Pushtetit Lokal, për bashkëpunimin e suksesshëm që mundësoi përfundimin e objektit vetëm gjashtë muaj e gjysmë pas vendosjes së gurthemelit, më 25 nëntor të vitit të kaluar.
Ky stacion pritet të luajë një rol kyç në forcimin e sigurisë në pjesën veriore të vendit dhe kontrollin më efikas të kufirit me Serbinë. m.p.
