Një gjykatës në Nju Jork ka rrëzuar padinë prej 400 milionë dollarësh të Justin Baldonit ndaj Blake Lively për shpifje dhe zhvatje. Të dy aktorët luajtën bashkë në filmin It Ends with Us (2024) dhe janë përfshirë në një betejë ligjore pas akuzave të Lively për ngacmim seksual ndaj Baldonit.
Gjykatësi Lewis Liman vendosi se padia e Baldonit nuk paraqiti prova të mjaftueshme dhe se deklaratat e Lively-t ishin të mbrojtura ligjërisht. Po ashtu, nuk u provua që gazeta New York Times kishte vepruar me keqdashje kur raportoi mbi çështjen.
Padia e Lively u ngrit në dhjetor 2024 ndaj Baldonit dhe kompanisë së tij Wayfarer Studios, duke pretenduar ngacmim në set dhe hakmarrje pas ankesave të saj. Baldoni reagoi me një kundërpadi, duke akuzuar aktoren, bashkëshortin e saj Ryan Reynolds dhe gazetën për shkatërrimin e reputacionit të tij.
Gjykata i lejoi Baldonit të riformulojë disa nga akuzat deri më 23 qershor. Ndërkohë, mesazhet e publikuara mes dy aktorëve tregojnë një raport miqësor dhe mbështetës gjatë xhirimeve, ndonëse me disa tensione të përshkruara më vonë./E.Ç
