A i kompenson shteti shqiptar, sipas Kushtetutës, ata që shpallen të pafajshëm pas vuajtjes së dënimit? Vetë gjyqtarët e konsiderojnë diskriminuese dhe të padrejtë shumën aktuale prej 3 mijë lekësh për çdo ditë qëndrimi në burg.
Bevis Shehaj, gjyqtar administrativ, ka paraqitur një padi në Gjykatën Kushtetuese, duke kërkuar që ligji “Për kompensimin e burgimit të padrejtë” të shpallet antikushtetues.
Ai kundërshton mënyrën aktuale të përllogaritjes së dëmshpërblimit, ku për një ditë paraburgim jepen 3 mijë lekë, për burgim 2 mijë lekë dhe për arrest shtëpiak vetëm 1 mijë lekë.
Sipas dokumenteve, nxitje për këtë padi është bërë rasti i Erjon Demajt, i cili u mbajt tre vite në paraburgim përtej vendimit përfundimtar që e dënoi vetëm me 8 muaj burg.
Në kërkesën drejtuar Kushtetueses, gjyqtari Shehaj thekson se kompensimi financiar nuk është proporcional me dëmet psikologjike dhe ekonomike që u shkaktohen të burgosurve, veçanërisht kur merret parasysh paga minimale mujore që aktualisht është 40 mijë lekë.
Kjo nismë vjen në një kohë kur avokatët kanë shprehur shqetësimin për mënyrën e trajtimit të kompensimeve, jo vetëm për ata që janë deklaruar të pafajshëm, por edhe për ata që kanë qëndruar në burg më gjatë sesa kohëzgjatja e dënimit të dhënë.
Gjyqtari Shehaj i referohet edhe jurisprudencës së Gjykatës së Strasburgut, duke theksuar nevojën për kontroll incidental të ligjit shqiptar. Ai sjell në vëmendje rastet e qytetarëve që kanë pasur të ardhura më të larta se minimumi jetik dhe që, pas shpalljes së pafajësisë, kanë përfituar një shumë simbolike në raport me të ardhurat e tyre reale.
“Personat që kanë fituar 1 500 apo 2 000 euro në muaj, jo vetëm që nuk kompensohen për dëmin jopasuror, por edhe kompensimi për dëmin pasuror del sa gjysma e humbjes reale që kanë pësuar,” thuhet në argumentimin e gjyqtarit.
Gjykata Kushtetuese pritet të vendosë mbi vlefshmërinë e këtij ligji, ndërsa deri atëherë procesi do të qëndrojë i pezulluar. m.p.
