Deputetja e Partisë Demokratike, Albana Vokshi, ka bërë kërdinë në Këshillin e Europës, duke dëmtuar imazhin e Shqipërisë me ligjëratën e saj patetike referuar zgjedhjeve të 11 majit.
Duke harruar se opozita mori 250 mijë vota më pak se në zgjedhjet e vitit 2021 dhe duke injoruar faktin se procesi i rinumërimit po tregon se vullneti i shqiptarëve nuk është tjetërsuar në kutitë e votimit, deputetja Vokshi e ka trajtuar Këshillin e Europës si emisionet e Eni Çobanit, duke u ankuar për ngjarje imagjinare dhe duke “iu përlotur” gjyqtares Europë.
“Më kërcënuan mua dhe vajzën”, ishte fjalia patetike që tha demokratja në mes të Europës, pa iu dridhur qerpiku. “Vota u ble edhe me paratë e taksapaguesve. Kam marrë pjesë në shumë zgjedhje. Por kurrë s’kam përjetuar atë që pashë këtë herë. Në Vorë, u kërcënova në mes të ditës nga kriminelë të dënuar për vrasje dhe trafik droge. Vajza ime gjithashtu u kërcënua. Pavarësisht telefonatave Policisë së Shtetit si dhe kallëzimeve zyrtare në SPAK, askush nuk veproi. Ata kriminelë janë ende të lirë, ndërsa unë druhem çdo ditë derisa fëmijët kthehen në shtëpi. Unë nuk hyra në politikë për të mbajtur armë – por për të ofruar një alternativë të bazuar te e vërteta”, u shpreh ajo.
Përgjigjja e Etilda Gjonajt për deklaratat e Vokshit ishte e qartë: “Nuk kanë fakte”.
Në fakt, opozitën qaramanse sot jo vetëm që nuk e beson kush në Shqipëri, por as në Europë, aty ku të gjitha palët janë të informuara qartë për situatën politike në vendin tonë.
Partia Demokratike është në grahmat e fundit dhe qytetarët shqiptarë kanë vite që tregojnë pezmatim të qartë dhe mospërfillje ndaj saj. m.p.
