Gjykata e Posaçme për Korrupsionin dhe Krimin e Organizuar ka dënuar 3 zyrtarë të Bashkisë së Kurbinit për shkelje tenderash dhe falsifikim dokumentesh. Në njoftimin e GJKKO-së thuhet se të pandehur në këtë çështje ishin Jeton Cakoni, Vlash Gega dhe Irisi Tahiraj, të akuzuar për “Shkelje të barazisë së pjesëmarrësve në tendera”, si dhe Donika Senka, e akuzuar për “Falsifikim të vulave dhe formularëve”, në mënyrë të përsëritur.
Jeton Cakoni dhe Vlash Gega u shpallën fajtorë për shkelje në tendera dhe u dënuan me 1 vit burgim secili, i konvertuar në 8 muaj burgim pas gjykimit të shkurtuar, me pezullim të dënimit dhe vendosjen në provë për 16 muaj. Të dyve u është ndaluar ushtrimi i funksioneve publike për 5 vite.
Donika Senka u shpall fajtore për falsifikim, e dënuar me 1 vit burgim, i konvertuar në 8 muaj, me pezullim të dënimit dhe provë për 16 muaj.
Gjykata urdhëroi gjithashtu që dokumentet e falsifikuara të shënohen si të tilla nga Bashkia Kurbin. Irisi Tahiraj u deklarua e pafajshme, pasi nuk u provua përfshirja e saj në veprën penale. m.p.
