Prokuroria e Posaçme Kundër Korrupsionit dhe Krimit të Organizuar (SPAK), ka mbyllur hetimet dhe ka dërguar për gjykim të pandehurit Gëzim Bakalli alias Shkembim Cërmanji dhe Erjon Locin, të përfshirë në trafikimin e lëndëve narkotike pjesë e organizatave kriminale.
Nga hetimet e zhvilluara përgjatë një viti në bashkëpunim me autoritetet zviceriane, është faktuar së Bakalli dhe Loci kanë trafikuar lëndë narkotike të siguruar kryesisht nga Amerika Latine dhe Gjermania për tu tregtuar më pas në në rajonin e Kantonit të Solothurn-it, si edhe në vende të tjera përgjatë viteve 2018-2024.
Gëzim Bakalli alias Shkembim Cërmanji akuzohet për veprat penale: “Trafikim i lëndëve narkotike”, “Falsifikim i dokumenteve”, “Falsifikim i letërnjoftimeve, i pasaportave ose i vizave” dhe “Falsifikim i akteve të gjendjes civile”.
Erjon Loci akuzohet për veprat penale: “Prodhim dhe shitje e narkotikëve” dhe “Grup i strukturuar kriminal”.
I pandehuri Gëzim Bakalli ka pasur rolin e drejtuesit dhe financuesit në këtë veprimtari të paligjshme kriminale, të cilën e ka konsumuar në bashkëpunim, në formë të grupit të strukturuar kriminal në 15 episode, ndërsa i pandehuri tjetër Erjon Loci, është njëri nga personat që ka ndihmuar të pandehurin Gëzim Bakalli, në transportimin dhe shitjen e lëndëve narkotike në territorin zviceran në 6 episode. m.p.
