“Nëse gjeni përherë e më pak qumësht vendi në tryezat tuaja, kjo është falë qeverisë socialiste. 12 vite vetëm shkatërrim bujqësisë! Toka e pasur shqiptare e shkretuar sepse ka nevojë për subvencione”.
Deputetja e Partisë Demokratike, Jorida Tabaku, ka bërë një reagim në faqen e saj zyrtare në Facebook për produktet vendase, të cilat po bëhen gjithnjë e më të pakta në krahasim me produktet e importit.
Duke iu referuar qumështit, ajo theksoi: “Produktet ‘made in Albania’ janë duke vdekur. Në 10 vitet e fundit, numri i gjedhëve ka rënë me 37%. Qeveria shqiptare nuk mbështet produktet shqiptare, por produktet nga jashtë që vijnë me import”.
“Ekonomia shqiptare nuk prodhon më për fshatin. As prodhon shqip, as jeton shqip, as punon shqip. Kjo duhet të ndryshojë. Kjo ka ardhur si rezultat i taksave të larta në bujqësi, i strukturës penalizuese të taksave, si rezultat i zhvlerësimit të euros por edhe si rezultat i një ekonomie që nuk fokusohet tek ajo që kemi. Ekonomia shqiptare duhet të prodhojë për shqiptarët.
