Në shtetin amerikan të Missouri, temperaturat ekstreme të ditëve të fundit kanë shkaktuar një incident të pazakontë: asfalti në një rrugë është çarë papritur, pikërisht përpara një veture që po udhëtonte me shpejtësi normale.
Drejtuesi i automjetit, ende i tronditur nga ngjarja, tregoi se gjithçka ndodhi për një çast.
“Nuk pata as kohë të reagoja,” tha ai për mediat lokale. “Thjesht pashë që rruga u hap përpara meje dhe nuk po kuptoja çfarë kishte ndodhur. Më pas kuptova se ishte çarje në asfalt”, shtoi vozitësi.
Fatmirësisht, askush nuk u lëndua në incident, por pamjet dhe raportimet nga vendi i ngjarjes po bëhen virale në rrjetet sociale – duke rikujtuar rreziqet e rritjes së temperaturave ekstreme, të cilat po ndikojnë gjithnjë e më shpesh edhe në infrastrukturën rrugore.
Ekspertët lokalë shpjegojnë se në kushte të tilla të nxehti, materiali i asfaltit zgjerohet më shumë se zakonisht, çka mund të shkaktojë çarje të menjëhershme ose ngritje të pllakave të rrugës – veçanërisht në rrugë të vjetra apo me mirëmbajtje të dobët.
Autoritetet kanë paralajmëruar drejtuesit e mjeteve që të jenë të kujdesshëm gjatë këtyre ditëve për shkak të mundësisë së incidenteve të ngjashme, ndërsa ekipet e mirëmbajtjes janë vendosur në gatishmëri për të inspektuar dhe riparuar rrugët më të rrezikuara. /E.T
