Presidenti i Shteteve të Bashkuara të Amerikës, Donald Trump është shfaqur për herë të parë në publik që nga fillimi i pandemisë me maskë në fytyrë.
Trump kishte vendosur një maskë ngjyrë blu të errët me një vulë me ngjyrë ari të presidencës në një fund, gjatë vizitës për në spitalin ushtarak Walter Reed në Uashington, ku ai është takuar me ushtarë të plagosur dhe personelin shëndetësor.
Presidenti Trump tha për mediat se kurrë nuk ka qenë kundër tyre.
“Nuk kam qenë kurrë kundër vendosjes së maskës, por mendoj se kanë vendin dhe kohën e duhur kur duhen përdorur. Mendoj se kur je në një spital dhe kur duhet t’u flasësh shumë njerëzve, të cilët sapo mund të kenë dalë nga salla e operacionit, është mirë të mbahet maska”, tha Presidenti amerikan.
Kur Qendra Amerikane për Parandalimin e Sëmundjeve nisi të rekomandonte njerëzit në prill për mbajtjen e maskave në publik për ndalimin e përhapjes së Covid-19, Trump u tha gazetarëve se vetë nuk do ta ndiqte këtë këshillë.
“Nuk mendoj se do të mbaj maskë. Të takosh me maskë presidentë, kryeministra, diktatorë, mbretër dhe mbretëresha, nuk më duket normale”, deklaronte Trump.
/En.Br./Fjala.al
