Prestigjiozja amerikane New York Times ka shkruar sot në lidhje me padinë e sotme të kreut të shtetit, Ilir Meta, ndaj ministres së Drejtësisë, Etilda Gjonaj dhe dy zyrtarëve të ministrisë.
“Ky është hapi i fundit i presidentit ndaj qeverisë së majtë të Partisë Socialiste, të cilën e akuzon për shkelje të Kushtetutës dhe lidhje me krimin e organizuar”, shkruan gazetat New York Times.
Ndërkohë presidenca ka zbardhur shkeljet e Etilda Gjonajt, duke publikuar në Fletoren Zyrtare të vendimit për emërimin automatikisht si anëtare të Gjykatës Kushtetuese të Arta Vorbsit, vendim i cili nuk publikohet ligjërisht në Fletoren Zyrtare.
Në kallëzimin dorëzuar sot pranë Prokurorisë së Posaçme, është edhe Gentian Deva, sekretari i Përgjithshëm i Ministrisë së Drejtësisë, i cili i ka kërkuar Qendrës së Botimeve Zyrtare të botojë aktin e betimit të Arta Vorbsit tek noterja si anëtare të Gjykatës Kushtetuese.
Duke e akuzuar edhe Devën për shpërdorim detyre, Presidenca thekson në padi se “veprimet e tij janë të qëllimshme, duke mbajtur në konsideratë se në detyrën e Sekretarit të Përgjithshëm, ka përcjellë vazhdimisht akte të Ministrisë së Drejtësisë për botim të Fletoren Zyrtare”.
“Me veprimet dhe mosveprimet e tij zoti Gentian Deva me detyrë Sekretar i Përgjithshëm, ka dëmtuar interesat e ligjshëm të shtetit, të shtetasve dhe të personave të tjerë juridikë. Publikimi në Fletoren Zyrtare, i një akti të tillë, i cili ligjërisht nuk është i botueshëm, ka sjellë ndërkohë dhe dëmtim të interesave shtetërorë në disa dimensione”.
Presidenca gjithashtu kallëzoi edhe drejtoreshën e Qendrës së Botimeve Zyrtare, Etleva Haxhia, e cila ka pranuar vetë se ka botuar një akt të pabotueshëm, me kërkesën eksplicite të Ministrisë së Drejtësisë.
Në padi thuhet se Prokuroria duhet të zbardhë nëse zonja Haxhia ka komunikuar me Kryetarin e Këshillit të Emërimeve në Drejtësisë, Ministren e Drejtësisë, apo ndonjë funksionar të lartë publik dhe nëse e kanë detyruar atë të dalë në punë ditën e shtunë, ditë pushimi zyrtar.
