Ëndrra e tifozëve të Lionel Messit dhe Cristiano Ronaldos mesa duket do të bëhet realitet. Dy yjet e futbollit që kanë ndarë më dysh botën e sportdashësve të futbollit, mund të luajnë në një skuadër së bashku.
Në Angli kanë nisur thashethemet se në muajin tetor të këtij viti po bisedohet për të zhvilluar një mbrëmje gala, një miqësore bamirësie në stadiumin “Uembli”, ku protagonist do të jetë një skuadër e përbashkët e formuar nga lojtarë të Juventusit dhe Barcelonës, pra skuadrat e Ronaldos dhe Messit, e cila do të sfidojë një formacion të përbërë nga yjet e skuadrave të Manchester United dhe Liverpoolit.
Pa dyshim që nëse diçka e tillë do të konfirmohej zyrtarisht, të parit CR7-ën dhe “Pleshtin” në të njëjtin ekip do të ishte diçka mitike, historike, dëshira e qindra milionave tifozësh raporton Panorama Sport. Dhe ndoshta në këtë mënyrë do të bëhej realitet edhe “profecia” e Lionel Mesit e pranuar hapur në një prej intervistave të tij të fundit:
“Nëse do të luaj me Ronaldon në një skuadër besoj se po, do isha gati t’ia pasoja topin, t’ia jepja pasimin e fundit”. Tani mbetet vetëm të presim dhe të shohim nëse kjo ndeshje do të bëhet e mundur…
