Myzyri është nën hetim për akuzën e “shkeljes së barazisë në tendera apo ankande publike”. Hetimet lidhen me një procedurë prokurimi të zhvilluar në vitin 2020, për mirëmbajtjen e një segmenti rrugor me vlerë mbi 219 milionë lekë, ku dyshohet se janë përdorur dokumente të falsifikuara dhe është favorizuar një grup operatorësh ekonomikë./E.S

Operacioni ndërkombëtar u zhvillua në kuadër të procedimit penal nr. 846/2025 dhe u realizua në bashkëpunim me Prokurorinë dhe Policinë Kombëtare të Kolumbisë, Policinë Kroate, si dhe me mbështetjen e EUROPOL dhe EUROJUST. Si rezultat, u ekzekutuan 19 masa sigurie, 9 në Shqipëri dhe 10 në Kolumbi, ndërsa 3 persona u shpallën në kërkim dhe 48 shtetase të huaja u proceduan penalisht.

Skema kriminale

Hetimet zbuluan se shtetasi L. B., 25 vjeç, i arrestuar në Kolumbi, kishte rolin kryesor në rekrutimin e vajzave nga vendet e Amerikës Latine dhe në organizimin e udhëtimit të tyre drejt Shqipërisë. Pasi mbërrinin në vend, ato detyroheshin të ushtronin prostitucion. Në rast refuzimi, grupi përdorte forcën dhe kanosjen, madje duke kërcënuar edhe familjarët e vajzave në vendet e origjinës.

Në Shqipëri, D. S. siguronte kushtet logjistike dhe akomodimin e tyre, ndërsa K. P. mblidhte të ardhurat e prostitucionit dhe i transferonte ato përmes kriptovalutave në llogaritë e drejtuesit të grupit.

Një tjetër i arrestuar, I. G., kishte përshtatur një hotel në rrugën “Reshit Collaku” në Tiranë, të cilin e kishte shndërruar në qendër prostitucioni për vajza kryesisht nga Kazakistani. Ndërkohë, D. B. sigurohej për shpërndarjen e lëndëve narkotike për vajzat dhe lehtësonte kontaktet me klientët.

Operacioni u mundësua falë bashkëpunimit me projektin WBCrimJust (Western Balkans Criminal Justice), platformën EMPACT (European Multidisciplinary Platform Against Criminal Threats) dhe programin EU4FAST që synon forcimin e luftës kundër trafikimit të qenieve njerëzore në Ballkanin Perëndimor.

Ky është një nga rastet më të mëdha të goditjes së rrjeteve ndërkombëtare të trafikimit të qenieve njerëzore mes Shqipërisë dhe Amerikës Latine./E.S

Të martohesh në Shqipëri, duket se po kthehet në një sport ekstrem, një sfidë që vetëm më të guximshmit dhe më të ‘çmendurit’ e ndërmarrin…

…Në modernitetin e epokës që po jetojmë, – që duket sikur lëviz me shpejtësinë e dritës, – ku dëshira për një jetë më të mirë shpesh na shpie larg shtëpisë, dashuria dhe martesa po kthehen në një metaforë të brishtë. Si mund të ndërtohet një jetë familjare në një kohë kur rruga drejt lumturisë është e mbushur me pengesa të paimagjinueshme? Ky realitet i ashpër, ku ëndrrat për të ardhmen përplasen me realitetin e hidhur të emigracionit dhe vështirësive ekonomike, po e kthen martesën në Shqipëri në një “sport” për të fortët, ku shpirti dhe zemra vihen në provë si kurrë më parë.

Statistikat e zbehura të martesës

Të dhënat e fundit nga INSTAT për vitin 2024 flasin vetë: numri i martesave në Shqipëri ka rënë në nivelin më të ulët që nga fillimi i viteve ’90. Vetëm 16,120 çifte vendosën të lidhin fatet e tyre, një shifër alarmante që tregon se martesat po kthehen në një “specie në zhdukje”.

–E pranoni për bashkëshorte shoqen Eva? – pyeste nëpunësi i Gjëndjes Civile, Danen, që spo linte dy gurë bashkë të zbriste nga fshati në qytet.

-Po.

–E pranoni për bashkëshort shokun Ramadan? – vazhdonte nëpunësi i Gjëndjes Civile tek filmi “Shkëlqim i Përkohshëm”

-Jo.

Martesa nuk u bë.

Ky fenomen nuk është rastësor. Ai është një pasqyrim i drejtpërdrejtë i dy plagëve kryesore që po e gërryejnë shoqërinë shqiptare: emigracioni masiv dhe kriza ekonomike. Si mund të martohen të rinjtë kur gjysma e tyre janë larg vendit dhe tjetra po lëviz për t’u larguar?

Emigracioni dhe kriza ekonomike

Sipas Organizatës për Bashkëpunim dhe Zhvillim Ekonomik (OECD), Shqipëria ka një nga shkallët më të larta të emigracionit në Evropë. Kjo “hemorragji” demografike, që i ka zhveshur qytetet dhe fshatrat nga shtresa më e re dhe më produktive, ka krijuar një hendek të thellë social. Shumë të rinj, të cilët ndërtojnë jetën e tyre jashtë vendit, e kanë të vështirë të krijojnë familje dhe të martohen me partnerë që jetojnë ende në Shqipëri.

Për ata që mbeten, lufta është me realitetin ekonomik. Çmimet e banesave kanë arritur nivele të papërballueshme, duke e kthyer blerjen e një prone në një ëndërr të largët pa një hipotekë afatgjatë. Ky realitet i detyron të rinjtë të punojnë në disa vende pune njëkohësisht, duke lënë pak vend për planifikimin e një të ardhmeje familjare. Si mund të nisë një çift një jetë të re kur bazat financiare janë aq të pasigurta?

Një thirrje e papërgjigjur nga politika

Në një kohë kur statistikat flasin qartë, politikanët vazhdojnë të bëjnë thirrje boshe për “rritje të natalitetit”. Por kjo rritje nuk arrihet me fjalë, por me veprime konkrete. Mungesa e paketave stimuluese për çiftet e reja – si kredi të buta, mbështetje për strehimin dhe punësimin – tregon se vëmendja e qeverisë është e fokusuar diku tjetër, shpesh te koncesionet dhe projektet që nuk sjellin ndihmë të drejtpërdrejtë për familjet.

Si rezultat, Shqipëria rrezikon të kthehet në një “realitet-shou” të quajtur “Kush rri më gjatë beqar pa u lëkundur”. Martesa, dikur një simbol i shpresës dhe i një të ardhmeje, rrezikon të bëhet një eksponat në muze. Ky realitet tragjik na bën të reflektojmë: çfarë duhet të ndodhë që dashuria dhe ëndrrat për familje të mos jenë më një sport ekstrem, por një rrugë e mundshme për të gjithë?

Kur dëgjova paralajmërimin e prerë të kryeministrit Rama se do të nisë sekuestrimi i të gjitha produkteve të qumështit dhe bulmetit që tregtohen pa faturë, m’u kujtua Xhezua. Hë ore Xhezua i romanit “Përballimi”, të shkrimtarit Teodor Laço, që regjisori Viktor Gjika e ktheu në film.

Se në Shqipëri, vetëm fshatarë si Xhezua shesin qumësht pa faturë, në atë që dikur e quanin “tregun e zi” dhe sot e quajnë “ekonomi informale”.

Dikur, në kohën e kooperativave dhe të bujqësisë së “lavdishme socialiste”, fshatarit i merrej gruri si “tepricë”. Domethënë zyrtarisht thuhej se ai e dorëzonte vetë. Me dëshirë.

-Ke parë ti që tani që e dorëzuam bereqetin ndihemi më të lehtësuar, – deklaronte Shemshedini në mbledhjen informale me shokët e tjerë të fshatit.

Në fakt, fshatari i shkretë ishte i detyruar të dorëzonte djersën e ballit sipas kuotave të përcaktuara nga lart – sepse ashtu e donte “plani dyvjeçar që do t’i sillte begatinë vendit”.

– Hiqeni atë parrullë! Eh sa punë duhet që të vijë begatia e vendit!, – udhëzonte sekretar Martini, me një zë të thatë e një çantë komisari hedhur supit.

Nuk kishte rëndësi nëse fshatarit i mbetej bukë për fëmijët. Llogarinë e bënte ai. Por tepricat duheshin dorëzuar për “atdheun”. Se, sipas logjikës së partisë, po pate tepricë, do të thotë se ke zënë rehat. Dhe kush është rehat, vë dhjamë. Dhe kush vë dhjamë, është kulak.

– A s’të tha sekretari se kulakët nuk kanë brirë?

-A s’të tha se ka fshatarë që kanë filluar të vënë dhjamë përditë?

-A nuk je ti një nga ata fshatarë që ke vënë dhjamë?

Këto i thoshte Nazifi, i shpallur kulak pa triska, Xhezos, një fshatar i mesëm, që shiste grurin në tregun e zi te pazari i Korçës me 120… asnjë centim më pak. Ose e ndërronte me ndonjë palë “çizme të afendikoit”.

Sot, në një tjetër regjim, po të njëjtit fshatar i vendoset tatim mbi bidonat e qumështit që shet për të kapur ndonjë lek e për të paguar dritat dhe ujin që ia faturon shteti. Jo më për kooperativën, por për të mbushur arkën e shtetit.

Sepse, sipas vendimit të fundit të qeverisë, edhe një grua që zbret nga mali me bidonët e saj për të shitur qumësht të freskët në qytet, konsiderohet “aktivitet ekonomik i paregjistruar”.

-Kujt kujton se po ia shket ti?

Fshatari, që dikur shpallej kulak pse kishte dy dele më shumë se të tjerët, sot shpallet evazor fiskal sepse guxon të mos lëshojë kupon tatimor për një bidon qumështi. Ironikisht, jeta e tij ka ndryshuar shumë pak, nga lufta ndaj “kulakëve” të djeshëm, te persekutimi i “prodhuesve informalë” të sotëm.

Nëse dje Sekretari i Partisë të paralajmëronte se “kulakët nuk kanë brirë, por janë më të rrezikshëm se armiqtë me armë”, sot nuk mungon zëri i zyrtarit modern që thotë: “Nuk ka zhvillim pa formalizim”.

Por në fakt, të dy flasin për të njëjtin njeri — fshatarin që zgjohet para agimit për të mjelë lopën dhe që zbret në qytet me shpresën se do të shesë pak qumësht për të blerë bukë e sheqer për fëmijët.

Ndërkaq, shteti — si atëherë, edhe sot — është aty: për të matur, për të regjistruar, për të numëruar.

Aty ku duhet ndihmë, ai sjell burokraci. Aty ku duhet mbështetje, vendos një taksë.

Ja kështu, filmi “Përballimi” i Kinostudios merr kuptim të ri në ditët tona.

Dikur, aty fshatari përballej me padrejtësinë e kolektivizimit të detyruar.

Sot, përballimi është tjetër — i heshtur, i zymtë dhe pa kamera.

Sepse dhuna nuk vishet më me çizme, por me vendime të Këshillit të Ministrave. Dhe të gjithë e pranojnë si “normalitet fiskal”.

Ndërkohë, për ministrat dhe burokratët e kafesë në Tiranë, bidoni i qumështit duket si mall luksi.

Por për fshatarin që zbret e ngjitet malit çdo mëngjes, ai është mjeti i fundit për të qëndruar në vendlindje.

Dhe, për çudi, përsëri ai bëhet armik i klasës — këtë herë, jo për grurin, por për qumështin.

Në një klimë të tensionuar politike, ku akuzat  dhe kundër akuzat për krime zgjedhore kanë nisur shumë më herët, Prokuroria e Përgjithshme ka riorganizuar strukturën e saj hetimore për të përballuar fluksin e pritshëm të denoncimeve. Kryeprokurori Olsian Çela thotë se përveç numrit të çështjeve që tashmë janë në hetim, në fokus është garantimi i integritetit të procesit edhe përballë rritjes së presioneve ndaj prokurorëve që merren me çështje sensitive.“Natyra e këtyre çështjeve e bën më të ndjeshme punën e prokurorëve dhe, pa diskutim, edhe më të ekspozuar ndaj presioneve. Kjo është një punë nën trysni, por ajo çka është e rëndësishme është që prokurorët të kenë mekanizmat për të ruajtur pavarësinë dhe për të qenë efektivë në kushtet që imponon realiteti politik”, deklaroi Çela. Ai pranoi se ka një sërë procedimesh që janë në fazën e verifikimeve, të nisura nga kallëzime të qytetarëve, aktorëve politikë apo organizatave monitoruese. Hetimet janë të ndara mes Prokurorisë së Posaçme dhe prokurorive vendore, me një koordinim të vazhdueshëm për të shmangur mbivendosjet apo ngërçet institucionale. “Ka raste kur ndarja e kompetencave nuk është e qartë që në fillim, por kemi ndërtuar një sistem komunikimi që lejon transferimin e menjëhershëm të materialeve në varësi të natyrës së veprës”, shtoi ai.

Bashkëpunim me SPAK dhe BKH

Për të garantuar mbulim hetimor në çdo qark të vendit, është vendosur që hetuesit e BKH të kenë akses fizik në ambientet e prokurorive të juridiksionit të përgjithshëm. Kjo lëvizje synon të shmangë vonesat logjistike dhe të forcojë praninë e strukturave antikorrupsion në terren. “Ne kemi krijuar hapësirat e nevojshme në prokuroritë vendore, që të mundësojmë një reagim të menjëhershëm në çdo situatë të lidhur me krimet zgjedhore”, tha Çela. Një javë para zgjedhjeve, do të hyjë në fuqi lista e re e gatishmërisë, ku numri i prokurorëve do të rritet ndjeshëm. Ky angazhim, sipas Çelës, synon të përballojë çdo eventualitet dhe të mbulojë në kohë reale çdo rajon ku shfaqen problematika. “Ne parashikojmë shtim të denoncimeve dhe incidenteve, ndaj do të kemi një prani të shtuar të prokurorëve të gatshëm për të ndërhyrë”, nënvizoi ai. Në çdo proces zgjedhor, Shqipëria është përballur me një mori kallëzimesh për shit-blerje vote, presion mbi administratën, përdorim të burimeve publike për fushatë dhe manipulim të listave zgjedhore. Shumë prej këtyre çështjeve janë mbyllur pa vendim përfundimtar, të tjera janë arkivuar pa hetim të thelluar, dhe vetëm një numër shumë i vogël ka çuar në ndëshkim penal. Kjo ka ndikuar drejtpërdrejt në perceptimin e qytetarëve për pandëshkueshmëri dhe ka ushqyer retorikën politike, ku palët akuzojnë njëra-tjetrën për kapje të institucioneve apo përdorim selektiv të drejtësisë. Çela e pranon këtë sfidë, por paralajmëron se do të ketë qëndrueshmëri: “Sot e gjithë struktura jonë ka mbështetje ligjore për të vepruar pavarësisht kushteve të vështira. Ne nuk mund të shmangim presionin, por mund të jemi të përgatitur për ta përballuar”.

Ndërsa fushata elektorale për zgjedhjet parlamentare të 11 majit vijon me intensitet të lartë në formën e fushatës që kanë zgjedhur të bëjnë partitë politke, organet e drejtësisë kanë evidentuar deri tani një numër të konsiderueshëm kallëzimesh dhe procedimesh penale që lidhen me veprat penale zgjedhore. Për një pjesë të çështjeve hetimet kanë ecur dhe nuk përjashtohet mundësia që në ditët e ardhshme para datës së zgjedhjeve të lëshohen disa urdhër-arreste. Qarqet më problematike konsiderohen Shkodra, Fieri dhe Elbasani, ku edhe ka pasur akuza publike kryesisht nga opozita. Megjithatë SPAK vetë ka nisur hetimet kryesisht pa denocim, pasi gjatë hetimeve të saj ka zbuluar veoprimtari të paligjshme që shlein Kodin Zgjedhor. Prokuroria e Përgjithshme bëm të ditur se deri më 28 prill 2025, në prokuroritë e juridiksionit të përgjithshëm janë regjistruar 14 kallëzime penale për krime të tilla si pengimi i subjekteve zgjedhore, dëmtimi me dashje i materialit zgjedhor, përdorimi i funksionit publik për veprimtari politike ose zgjedhore dhe kanosja apo dhunimi ndaj pjesëmarrësve në zgjedhje. Kallëzimet janë bërë në 7 raste nga policia gjyqësore, në 3 raste nga Struktura e Posaçme Kundër Krimit të Organizuar dhe Korrupsionit, në 2 raste nga subjektet politike, ndërsa një kallëzim është nisur kryesisht dhe një tjetër nga një qytetar. Në aspektin gjeografik, nga këto kallëzime, 5 janë regjistruar në Prokurorinë e Fierit, 3 në Prokurorinë e Sarandës, 2 në Prokurorinë e Tiranës, 2 në Prokurorinë e Gjirokastrës dhe nga 1 rast në Prokurorinë e Durrësit dhe të Elbasanit. Nga këto kallëzime, 7 prej tyre kanë avancuar në regjistrimin e procedimeve penale, ku 5 procedime i përkasin Prokurorisë së Fierit dhe 2 procedime janë regjistruar në Prokurorinë e Gjirokastrës. Një pjesë e kallëzimeve të regjistruara në rrethe janë dërguar për kompetencë në SPAK. Konkretisht, Prokuroria e Durrësit i ka dërguar SPAK një kallëzim, ndërsa Prokuroria e Fierit ka referuar një procedim penal. Pjesa tjetër e kallëzimeve vijon të jetë në fazën e verifikimit.  Në një tjetër linjë, SPAK ka regjistruar deri tani 18 procedime penale të lidhura me krimet zgjedhore, që nga janari i vitit 2025. Në një përgjigje zyrtare drejtuar Partisë Demokratike, SPAK bën me dije se nga këto 18 procedime, 5 janë të nisura kryesisht nga vetë Struktura e Posaçme. Sipas SPAK, kjo shifër pasqyron angazhimin konkret të strukturës për të ndjekur dhe hetuar çdo veprim penal që cënon procesin zgjedhor. Në këtë kuadër, që në janar të këtij viti SPAK ngriti një Task Forcë të dedikuar për parandalimin dhe hetimin e krimeve zgjedhore, e cila do të funksionojë deri në përfundim të zgjedhjeve të 11 majit. Në krye të kësaj Task Force është vetë kryeprokurori Altin Dumani, ndërsa për ndjekjen e çështjeve në Tiranë janë caktuar zv.drejtuesi i SPAK dhe shefat e seksioneve për krimin e organizuar dhe korrupsionin, Adnand Xholi dhe Klodian Braho. Në lidhje me hetimet konkrete, rasti i vetëm i bërë publik deri tani është ai i Lushnjës, ku një qytetar denoncoi se një përfaqësues politik i kishte premtuar 500 euro për votat e familjes dhe në këmbim i kishte marrë kartën e identitetit. Pas ndërhyrjes së policisë, karta e identitetit u gjet gjatë një kontrolli në banesë. Në total, deri në fund të prillit, numri i kallëzimeve dhe procedimeve penale të lidhura me krimet zgjedhore të 11 majit arrin në 32 raste, një tregues i qartë i intensifikimit të vëmendjes së organeve të drejtësisë për të garantuar një proces të rregullt dhe të pandikuar nga veprime të paligjshme.

Pas publikimit të lajmit se Partia Demokratike ka paguar 6 milionë dollarë një kompani lobimi të lidhur me presidentin Donald Trump, Prokuroria e Posaçme Antikorrupsion njoftoi nisjen e verifikimeve për burimin dhe qëllimin e financimit. Në kontratën e publikuar, Partia Demokratike përmes firmës së Sekretarit të Përgjithshëm Flamur Noka dhe garantorit shqiptaro-amerikan Nuredin Seci, angazhohet të paguajë kompaninë “Continental Strategy” me pagesa mujore për një periudhë dyvjeçare. Selia blu ka tentuar ta paraqesë këtë kontratë si një ndihmë “patriotike” nga emigrantët shqiptarë në Shtetet e Bashkuara të Amerikës. Por kontrata, përmbajtja dhe afërsia e firmës lobuese me rrethin e Trump, tregojnë qartë se interesi real është personal: të shfuqizohet “non grata” që i është vendosur Sali Berishës nga Departamenti Amerikan i Shtetit. Në mënyrë të qëllimshme, Partia Demokratike, e cila sot drejtohet nga Berisha, nuk sqaron dot pse u zgjodh pikërisht një firmë e lidhur drejtpërdrejt me rrethin më të afërt të Trumpit. “Continental Strategy” drejtohet nga Carlos Trujillo, një ish-këshilltar i Trump, dhe në radhët e saj ka emra si Katie Ëiles, vajza e Susie Ëiles, bashkëdrejtuese e fushatës së Trump në 2024, si dhe Alberto Martinez e Alex Garcia, figura të njohura të stafit republikan. Qëllimi i vërtetë i kësaj kontrate lobimi nuk është as demokratizimi i Shqipërisë, as forca politike e Partisë Demokratike, por një operacion për interesa personale të Sali Berishës. Për këtë arsye, në vend që të kërkonte mbështetje për zgjedhjet e ardhshme apo projekte reformuese për Shqipërinë, Partia Demokratike ka investuar energji dhe para për të zhbërë damkën personale të Berishës. Për ta arritur këtë, Berisha ka përdorur pa asnjë ngurim emrin e Partisë Demokratike dhe bujarinë e komunitetit shqiptaro-amerikan, duke e fshehur objektivin real pas një fasade patriotike dhe anti-korrupsioni. Në deklaratat e saj, PD thotë se është “transparente”, por në të vërtetë nuk pranon të publikojë kontratat e plota dhe nuk jep asnjë shpjegim për lidhjet e mundshme me konsulentë si Chris LaCivita, i njohur si drejtuesi i fushatës së Trump në 2024 dhe bashkëpunëtor i Susie Ëiles. Po ashtu, prej muajsh, rreth oborrit të Berishës qarkullon edhe emri i lobistit Paul Manafort, një figurë tjetër e lidhur me skandale lobimi dhe me Trumpin. Në deklaratën për shtyp tës selisë blu thuhet se: “Pasi e përdori SPAK për vite me radhë si kapak për pusetën e skandalit të tij me McGonigal, sot Rama ka zgjuar sërish nga gjumi ata që kanë mbyllur sytë teksa kartelët e drogës në Tiranë, Durrës, Elbasan dhe Shkodër janë përfshirë më fort se kurrë për të deformuar vullnetin e zgjedhësve, njëlloj siç mbyllën veshët para audiove të dosjeve 339 dhe 184! Njëlloj siç kanë mbyllur sytë para 150 milionë eurove të vjedhura të inceneratorëve, nga të cilat SPAK jo vetëm nuk ka rekuperuar asnjë qindarkë, por hesht si fija e barit se ku kanë përfunduar 150 milionë euro për një vepër që nuk ekziston. Mesa duket kontrata e PD me avokatin e Presidentit Trump nuk ka trembur vetëm Ramën, por dhe veglat e tij. Në fakt, jo pa të drejtë! Pasi sot denoncimet e saj për McGonigal, përzierjen e karteleve të drogës të mbështetur nga Edi Rama dhe narkopolicia në procesin zgjedhor, përfshirë bashkëpunimin e heshtur të organeve të drejtësisë, kanë veshin e administratës dhe Kongresit të SHBA!”. Partia Demokratike ka falenderuar shqiptarët e Diasporës për këtë donacion. “Partia Demokratike është transparente për kontratën me avokatin e Presidentit Trump, e cila është nënshkruar në përputhje të plotë me ligjet e të dyja vendeve dhe depozituar në FARA sipas çdo rregulli! Partia Demokratike gjen dhe njëherë rastin të falënderojë patriotët e komunitetit shqiptaro-amerikan për bujarinë dhe ndihmën e pakursyer për çmontimin e regjimit të Edi Ramës!”, thuhet në njoftim.

Hetimet nga SPAK

SPAK, pas publikimit të kontratës, ka konfirmuar zyrtarisht nisjen e hetimeve për shumat dhe burimet financiare të kontratës, ndërsa PD ka reaguar duke akuzuar qeverinë dhe SPAK-un për “presion politik”, pa sqaruar në asnjë moment elementët konkretë të financimit. Në një deklaratë për mediat, zyra e shtypit e SPAK sqaron: “Ju informojmë se Prokuroria e Posaçme ka filluar verifikimet në lidhje me kontratën e lobimit të Partisë Demokratike.” Ky reagim erdhi një ditë pas shpërndarjes së lajmit për një kontratë lobimi prej 6 milionë dollarësh, të nënshkruar nga Partia Demokratike me një kompani në Uashington DC, me një periudhë dyvjeçare. Sipas dokumenteve, kontrata është firmosur më 4 prill nga sekretari i përgjithshëm i PD-së, Flamur Noka, ndërsa si garant në SHBA është një individ i quajtur Nuredin Seçi. Nëse në të kaluarën Berisha kishte tentuar pa sukses me kompani si ajo e Charles Black për të hequr “non gratën”, këtë herë ai ka vendosur të përdorë Partinë Demokratike si instrument, duke rrezikuar seriozisht integritetin politik dhe moral të një force politike që dikur përfaqësonte idealet e antikomunizmit dhe demokracisë. Fakti që një pjesë e konsiderueshme e resurseve dhe energjive të PD-së janë përqendruar në luftën personale të Sali Berishës kundër sanksioneve amerikane, tregon qartë se në këtë parti, interesat personale të liderit historik prevalojnë mbi misionin, mbi interesin publik dhe mbi të ardhmen e vetë Partisë Demokratike.

Një qytet tradicionalisht i djathtë si Shkodra, është kthyer në një “arenë përplasjesh” politike në prag të zgjedhjeve të 11 majit mes aleatëve. Megjithëse në vitin 2023 qytetarët e saj i dhanë një mandat Benet Becit nën siglën e Partisë Socialiste, por me ndihmën me shumë peshë të PSD-së të Tom Doshit, gara këtë vit duket më e ndezur. Të gjitha palët e përfshira po i llogarisin me kujdes hapat në këtë territor me peshë simbolike e numerike në politikën shqiptare. Një nga zhvillimet më të papritur ka ardhur nga Tom Doshi, aleat i pandarë i Edi Ramës. I pranishëm në Shkodër ditën e mërkurë, kreu i PSD-së dhe figurë me ndikim në këtë zonë, sulmoi ashpër qeverinë dhe drejtuesit lokalë të PS-së. Në një deklaratë që befasoi edhe mbështetësit e tij, Doshi hodhi akuza të drejtpërdrejta ndaj kandidatit Benet Beci dhe kabinetit të Ramës. “Të vjen turp kur sheh gjysmën e qeverisë në burg dhe nën hetim. Ne nuk mund të mbrojmë njerëz që vjedhin qytetarët. Kryetari i Bashkisë Shkodër është i pandehur, si mund të drejtojë ai fushatën?”, deklaroi Doshi, duke shkëputur kështu një lidhje të heshtur bashkëjetese me qeverinë. Të premte ishte kryeministri Edi Rama i cili me një fjalim të gjatë përpara grave dhe vajzave shkodrane kujtoi komunistët. Në stilin e tij polemizues, Rama solli në vëmendje të kaluarën politike të Sali Berishës, duke e akuzuar si “komunist të vjetër”, ndërsa ironizoi për përdorimin e këtij epiteti ndaj vetes nga opozita. “Më thonë mua komunist, por mbajnë përkrah bufin sekretar partie. Berisha ishte funksionar që ka persekutuar njerëz. Shkodra që la ai ishte në rrënim, sot është ndryshe”, tha Rama. Ai theksoi gjithashtu investimet dhe projektet që, sipas tij, kanë ndryshuar rrënjësisht qytetin: “Shkodra vitin e kaluar realizoi të ardhurat më të mëdha në historinë e saj falë turizmit. Qyteti buburronte nga vizitorët. Ne e kemi nxjerrë nga harresa ku e la PD-ja. Ata që e lanë Shkodrën në prapambetje, mund të kthehen te oxhaku i gjyshërve.” Përplasja Doshi–Rama në një qytet që historikisht nuk ka qenë terren i lehtë për të majtën, shton pasigurinë dhe tensionin në fushatën elektorale. Me 11 majin që afron, Shkodra duket se do të jetë një nga zonat më të vështira për t’u parashikuar. Vizita e shpejtë e Ramës në Shkodër, pas deklaratave të Doshit, i cili vijon të jetë aleat de fakto, ndonëse nuk është i zyrtarizuar mbetet një tregues që Shkodra do ketë fushatë të ashpër.

Qendër teknologjike…

Në Shkodër, kryeministri Edi Rama u përball me kërkesën për pasjen e një qendre teknologjike, si ajo e Tiranës tek piramida e transformuar. “Godina TV Shkodër… uzina e telelit… jemi duke punuar… Ne duhet të ecim me një program qeveri-bashki-arte-kulturë në Shkodër, pasi këtu ka një traditë dhe mund të bëjnë punë të madhe për më shumë turizëm dhe biznes”, thotë Rama. Në planet e qeverisë, tha Edi Rama, Shkodra është pjesë e hartës për rivitalizimin e industrisë ushtarake, ndërkohë foli për një zhvillim pozitiv në këtë qytet. “Rritje kërkesash për ndërtim në Shkodër. Ishte në stacion. Sot, në KKRT, kemi kërkesa për ndërtim, që do të thotë se tregu ka nisur të lëvizë. Po flas për qytetin, jo Velipojën”, shton kryesocialisti. Më herët, kryeministri prezantoi premtimin e mbajtur për rrugën e përfunduar Shëngjin – Velipojë dhe njoftoi nisjen e punëve për aksin Milot-Balldren dhe Milot-Murriqan, përfshirë rrugën lidhëse me plazhin e Tales. “Është vërtetë një moment lehtësimi, sepse me këtë rrugë të re, si dhe me segmente të tjera të kësaj natyre që kemi investuar apo po vazhdojmë të investojmë nëpër Shqipëri, i zbulojmë shqiptarëve, por edhe turistëve, një pjesëz të magjishme të Shqipërisë që deri dje ishte e paaksesueshme. Dhe By Passi i Shëngjinit, që është një kërkesë e vjetër e Markut, desha të them e shokut Mark, por është zotit Mark, sepse shok nuk bëhet ky, është nga ata të paepurit e lirisë dhe demokracisë, por ne i duam të gjithë, sepse këtu na bashkon Partia e Punës, apo jo Mark? Ne jemi me punën”, tha Rama.

Votimi nga jashtë territorit të Shqipërisë po aplikohet për herë të parë në një proces zgjedhor dhe ndonëse konsiderohet një hap i rëndësishëm drejt përfshirjes së diasporës në jetën politike të vendit, zbatimi i tij praktikë është shoqëruar me një sërë vështirësish. Komisioni Qendror i Zgjedhjeve ka deklaruar angazhim maksimal për garantimin e barazisë dhe rregullsisë në këtë proces, por rrjedha e ngjarjeve tregon se pengesat logjistike dhe mungesa e koordinimit me shërbimin postar kanë krijuar situata të ndërlikuara për një pjesë të madhe të votuesve.

Ankesa nga Partia Socialiste

Partia Socialiste i është drejtuar zyrtarisht Komisionit Qendror të Zgjedhjeve me një letër ku liston problemet e konstatuara në votimin nga jashtë. Në këtë ankesë, PS thekson se një pjesë e mirë e qytetarëve shqiptarë që jetojnë jashtë vendit nuk kanë marrë njoftime të sakta dhe në kohë nga kompania DHL për dërgimin e zarfeve me fletët e votimit. Këto shqetësime janë më të dukshme në dy shtetet ku ndodhet numri më i madh i emigrantëve shqiptarë, Greqi dhe Itali. Mes problemeve të evidentuara përmendet mungesa e komunikimit efektiv nga ana e DHL-së, me qytetarë që raportojnë pamundësi për të kontaktuar shërbimin postar, telefonata të pasuksesshme, apo edhe refuzim për të marrë zarfin e kthimit. Në disa raste, votuesve u është kërkuar që të dorëzojnë fizikisht zarfin në sportel, gjë që bie ndesh me udhëzimet e procesit. Gjithashtu, janë raportuar raste kur në zarfin e dërguar ka munguar fleta e votimit, problem i hasur në vende si SHBA, Angli, Itali dhe Greqi. Nuk mungojnë as rastet kur zarfi ka mbërritur vetëm për disa anëtarë të një familjeje, ndonëse të gjithë janë regjistruar në të njëjtën kohë dhe me të njëjtën adresë në sistemin PER. Partia Socialiste i kërkon KQZ-së të ndërhyjë menjëherë pranë DHL-së për të zgjidhur problemet e konstatuara dhe për të garantuar një standard të njëjtë për të gjithë votuesit jashtë vendit.

Publikimi i votës, shkelje e hapur e ligjit

Një tjetër zhvillim shqetësues që ka shoqëruar procesin e votimit nga jashtë është publikimi i hapur i votës nga ana e disa qytetarëve, kryesisht simpatizantë të Partisë Demokratike dhe Partisë Socialiste. Këta votues kanë ndarë në rrjetet sociale foto dhe video të fletës së votimit, në një akt që, përveçse bie ndesh me ligjin zgjedhor, është kthyer në një lloj trendi në platformat online. Një rast i fundit është ai i një emigranti shqiptar, i cili ka publikuar një video në Facebook ku, duke reaguar ndaj deklaratës fyese të Edi Ramës për “burrat çyrykë”, shprehet se ai dhe familja e tij kanë votuar për Partinë Demokratike pikërisht për këtë arsye. Në video ai shfaq zarfin e votimit, bën thirrje për votë dhe e shoqëron postimin me mesazhe të qarta politike, në shkelje të plotë të dispozitave ligjore për fshehtësinë dhe integritetin e votës. Rasti është bërë edhe më i debatueshëm pasi ka marrë përkrahje publike nga gjyqtari Gjin Gjoni, aktualisht kandidat për deputet në Qarkun e Lezhës nën siglën e Partisë Demokratike. Gjoni ka ndarë videon e emigrantit në profilin e tij personal në Facebook, duke e cilësuar atë si “akt patriotik” dhe duke i dhënë përmasë politike një akt që nga KQZ konsiderohet si vepër penale.

Qëndrimi i KQZ-së
Në reagimin e tij publik, Komisioneri Shtetëror i Zgjedhjeve Ilirjan Celibashi ka deklaruar se pjesa dërrmuese e procesit është zhvilluar normalisht dhe se ankesat e adresuara janë të natyrës sporadike. “Nga mbi 154 mijë fletë votimi të dërguara, kemi vetëm rreth 100 raste problematike,” tha Celibashi. Megjithatë, ai ka shprehur shqetësimin e tij të fortë për trendin e publikimit të votës nga ana e qytetarëve që votojnë nga jashtë. “Njerëzit po kryejnë një vepër penale dhe nuk e kuptojnë. Ne po shpenzojmë një buxhet të konsiderueshëm për këtë proces dhe u kërkoj të gjithëve të tregohen seriozë,” theksoi Celibashi. Në përmbyllje, ai apeloi për përmbajtje edhe në gjuhën politike që përdorin liderët në fushatën zgjedhore brenda vendit, duke theksuar nevojën për ruajtjen e integritetit të procesit dhe etikës publike.

Votimi në burg
OSBE trajnon punonjësit e administratës për 11 Majin

Në prag të zgjedhjeve parlamentare të 11 majit, Prezenca e OSBE-së në Shqipëri, në bashkëpunim me Drejtorinë e Përgjithshme të Burgjeve, organizoi një trajnim për rreth 45 punonjës të nivelit të lartë të burgjeve mbi të drejtën e votës në institucionet e ekzekutimit të vendimeve penale. Qëllimi i këtij trajnimi ishte të mbështeste administratën e burgjeve për të siguruar mbrojtjen dhe lehtësimin e ushtrimit të të drejtës së votës nga të dënuarit dhe të paraburgosurit, në përputhje me legjislacionin kombëtar dhe standardet ndërkombëtare. Programi përfshiu një gamë të gjerë temash, që nga kuadri ligjor që rregullon të drejtën e votës së të burgosurve, masat praktike për lehtësimin e votimit në burgje e deri te praktikat më të mira dhe mësimet e nxjerra nga zgjedhjet e mëparshme. Pjesëmarrësit u angazhuan në sesione ndërvepruese për të nxitur pjesëmarrjen në zgjedhje të të burgosurve me të drejtë vote. Trajnimi, gjithashtu, adresoi sfidat logjistike dhe ligjore me të cilat përballet administrata e burgjeve gjatë zgjedhjeve dhe ofroi udhëzime praktike për të siguruar transparencë, akses dhe siguri gjatë procesit të votimit. “Sot, fokusohemi në një nga gurët themeltarë të demokracisë: të drejtën për të votuar. Në Shqipëri, Kushtetuta dhe Kodi Zgjedhor e garantojnë këtë të drejtë për të gjithë qytetarët, përfshirë edhe personat e burgosur, përveç rasteve kur kjo e drejtë është hequr shprehimisht me vendim gjykate. Prandaj, është përgjegjësia juaj, si në aspektin ligjor ashtu edhe në atë etik, që kjo e drejtë të respektohet dhe të mundësohet,” tha ambasadori Michel Tarran, Kryetari i Prezencës së OSBE-së. Drejtori i Përgjithshëm i Burgjeve, Klevis Qose, tha se janë gjithsej 3 027 persona, të dënuar dhe të paraburgosur, që pritet të ushtrojnë të drejtën e tyre kushtetuese për të votuar, në 21 institucione të ekzekutimit të vendimeve penale. “Procesi zgjedhor në institucionet penitenciare do të zhvillohet në përputhje të plotë me standardet kushtetuese dhe ndërkombëtare, falë edhe bashkëpunimit me OSBE-në. Kërkoj seriozitet maksimal nga të gjithë punonjësit e përfshirë në këtë proces. Mbi të gjitha, duhet të garantohet që vullneti i çdo individi të shprehet lirisht dhe pa asnjë lloj ndikimi”, tha ai.

 Ish-kryeministri Sali Berisha, përveç angazhimit në fushatën elektorale, ndodhet edhe përballë sfidës së drejtësisë. Pas seancës paraprake që u mbajt dje, gjyqtarja Flojera Davidhi është tërhequr për të dhënë vendimin sot në orën 13:00 se çfarë do të ndodhë me fatin e ish- kryeministrit Sali Berisha, si dhe dhëndrin e tij, Jamarbër Malltezi. Ndërkohë, po dje Gjykata e Apelit të GJKKO vendosi të lërë në fuqi masën e sigurisë “arrest me burg” për ish-kryetarin e Bashkisë së Tiranës, Erion Veliaj. Gjyqtari Erjon Bami refuzoi kërkesat e mbrojtjes për ndryshimin e masës, duke pranuar kërkesën e SPAK për të vijuar me të njëjtën masë sigurie. Sipas përfaqësuesve të Prokurorisë së Posaçme, janë kryer deri tani 112 veprime hetimore, përfshirë sekuestrimin dhe analizën e pajisjeve elektronike, si dhe marrjen e dëshmive të personave të përfshirë. Veliaj është arrestuar më 10 shkurt 2025, për akuzat e korrupsionit pasiv dhe fshehjes së pasurisë gjatë ushtrimit të detyrës. Gjithashtu gjykata refuzoi edhe kërkesën e biznesmenit Elman Abule për ndryshim të masës “arrest shtëpie”. Abule u arrestua në një ditë me Veliajn, nën akuzë për korrupsion aktiv dhe pastrim parash, për të njëjtat çështje. Aktualisht procesi gjyqësor ndaj ish-kryeministrit Berisha konsiderohet i rëndësishëm pasi ndodhet në kulmin e fushatës elektorale. Sipas avokatit Genc Gjokutaj, gjykata ka mbyllur vetëm pjesën e shqyrtimit të kërkesave paraprake, ndërsa nuk ka dhënë ende një vendim përfundimtar për kalimin e dosjes në gjykim. “Gjykata u tërhoq dhe ka marrë vendim vetëm për kërkesat tona për pavlefshmëri dhe papërdorshmëri. Nesër do të mësojmë nëse çështja do të shkojë në gjyq”, deklaroi Gjokutaj, duke shtuar se mbrojtja do të konsultohet me klientët për ndonjë kërkesë tjetër procedurale. “Ne kemi kërkuar pavlefshmëri për një sërë aktesh që nga kërkesa që gjykata ti bëjë thirrje prokurorisë, ti kërkojë saktësimin e akuzës, të individualizojë provat për secilin subjekt në këtë proces, sepse siç e kemi thënë prokuroria ka sjellë të gjitha provat për të gjithë. Një e paprecedentë kjo, sepse secili i pandehur në këtë proces ka fabulën e tij dhe provat që i përkasin sipas ligjit, për ato vepra penale që akuzohen. Dhe gjykata e gjeti të rregullt këtë mënyrë. Ka rrëzuar kërkesat tona për pavlefshmërinë e ekspertëve që s’kanë edhe njohurinë e posaçme. Pra gjithë vendimmarrja që ka dhënë sot, rrëzoi të gjitha kërkimet që ne kemi bërë gjatë seancës paraprake. Unë jam i paqartë në lidhje me këtë vendim gjyqësor, sepse procedura është e zezë mbi të bardhë, ju pëlqen apo s’ju pëlqen. Unë nuk mund të konsumoj kërkimet e mundshme që mund të bëjmë ose jo, para se të konsultohem me personat që më kanë mandatuar për të bërë këtë punë”, tha Gjokutaj. Procesi është zvarritur prej më shumë se 6 muajsh, çka shihet si një mundësi për Berishën që të përfundojë fushatën zgjedhore të 11 majit pa përballje gjyqësore. Aktualisht, Berisha është nën masën “detyrim paraqitje” për akuzën e korrupsionit pasiv, ndërsa Malltezi ndodhet në “arrest shtëpie” për korrupsion pasiv dhe pastrim parash. Nga privatizimi i ish-Klubit Sportiv “Partizani”, ku përfitues rezulton dhëndri i Berishës, janë ndërtuar të paktën 19 kulla. Përveç Berishës dhe Malltezit, të pandehur në këtë çështje janë edhe biznesmeni Fatmir Bektashi, i akuzuar për korrupsion aktiv dhe pastrim parash, si dhe Xhimi Begeja, ortak i Malltezit dhe bashkëpronar i kompanisë “Homeplan”. Nën hetim është edhe financierja Andia Pustina. Së bashku me ta janë përfshirë në akuzë dhe subjektet tregtare “Studio Pustina”, “Homeplan” dhe “Kontakt”, për veprën penale të pastrimit të parave.