Në paketë, parashikohen gjoba 10,000–100,000 lekë për pjesëmarrje në tubime të ndaluara e fshehja të paligjshme të identitetit; 20,000– 200,000 lekë për mosbindje ndaj urdhrave të shpërndarjes, ndërsa në rastet kur personat janë të maskuar, gjoba varion 50,000– 500,000 lekë. Policia do t’i regjistrojë në formë audiovizuale njoftimet për shpërndarje.

Personat që bllokojnë rrugën gjatë tubimeve do të gjobiten me 5000 lekë.

DISA SHTESA DHE NDRYSHIME NË LIGJIN NR.8773, DATË 23.4.2001, “PËR TUBIMET”

Në mbështetje të nenit 101 të Kushtetutës, me propozimin e ministrit të Punëve të Brendshme, Këshilli i Ministrave

Në ligjin nr.8773, datë 23.4.2001, “Për tubimet”, bëhen këto shtesa dhe ndryshime:

Pas nenit 12 shtohen nenet 12/1 e 12/2, me këtë përmbajtje:

Kufizimet e përkohshme rreth objekteve të përcaktuara

1. Kur ka rrezik real, serioz e të afërt, të bazuar në fakte konkrete, për dhunë ndaj personave ose për dëmtime të rënda të pronës, drejtuesi i drejtorisë vendore të policisë, me miratimin e prefektit, mund të ndalojë ose të kufizojë tubimet në një perimetër të përcaktuar rreth institucioneve arsimore, shëndetësore ose shtetërore, për një periudhë jo më të gjatë se 72 orë.

2. Vendimi përcakton saktësisht perimetrin, kohëzgjatjen dhe arsyet, publikohet menjëherë në mënyrë të aksesueshme dhe zbatohet vetëm pas publikimit. Ai mund të rinovohet vetëm një herë, me vendim të ri të arsyetuar.

3. Çdo person i interesuar mund ta ankimojë vendimin në gjykatën administrative, e cila vendos brenda 48 orëve. Ankimi nuk e pezullon zbatimin, përveç kur gjykata vendos ndryshe.

4. Kufizimi nuk mund të përfshijë të gjithë territorin e një njësie të vetëqeverisjes vendore dhe nuk zbatohet ndaj të miturve të shoqëruar nga prindi, kujdestari ligjor ose një i rritur përgjegjës, kur ata kalojnë nëpër perimetrin e përcaktuar për të shkuar ose për t’u kthyer nga shkolla, vendbanimi, institucioni shëndetësor, institucioni i përkujdesjes sociale ose një veprimtari edukative, kulturore apo sportive.

5. Ky nen nuk cenon kompetencën e drejtuesit të komisariatit të policisë për ndalimin ose kufizimin e një tubimi të caktuar, sipas nenit 8, të këtij ligji.

Urdhri i largimit nga zonat e mbrojtura

1. Në kuptim të këtij ligji, zona të mbrojtura janë:

a) stacionet, terminalet dhe mjetet e transportit publik, portet dhe aeroportet;

b) perimetri rreth institucioneve arsimore, shëndetësore dhe objekteve të trashëgimisë kulturore;

c) zonat e tjera të përcaktuara me vendim të këshillit bashkiak të botuar dhe të shënuara në terren, kur atje janë dokumentuar vepra të përsëritura kundër personit ose pronës.

2. Punonjësi i Policisë së Shtetit mund të urdhërojë një person të largohet nga një zonë e mbrojtur për një periudhë jo më të gjatë se 48 orë, kur personi, me sjelljen e tij konkrete, kanos, ngacmon në mënyrë të përsëritur ose ushtron dhunë ndaj personave, dëmton pronën ose pengon me dhunë aksesin dhe përdorimin e zonës.

3. Urdhri jepet me shkrim, përmban faktet konkrete dhe arsyet, mbi të cilat mbështetet, përcakton zonën, nga e cila personi duhet të largohet, dhe kohëzgjatjen e masës, si dhe i njoftohet personit, të cilit i dorëzohet një kopje. Ai nuk zbatohet për vendbanimin, vendin e punës, institucionin arsimor, institucionin shëndetësor, ku personi trajtohet, dhe zyrën e avokatit.

4. Urdhri nuk mund të jepet për shkak të pjesëmarrjes në një tubim paqësor, për shkak të karakteristikave personale të personit, statusit social, kombësisë ose pamjes së tij, apo vetëm për shkak të precedentëve penalë.”.

Pas nenit 19 shtohet neni 19/1, me këtë përmbajtje:

Thirrjet për dhunë nëpërmjet rrjeteve sociale gjatë organizimit dhe zhvillimit të tubimeve

1. Kur, nëpërmjet rrjeteve sociale, postës elektronike dhe/ose komunikimeve telefonike, përcillen, publikohen ose shpërndahen mesazhe, që përmbajnë thirrje për dhunë, në kuadër të organizimit ose zhvillimit të një tubimi, Policia e Shtetit, pasi identifikon llogarinë, adresën elektronike dhe/ose numrin e telefonit, nëpërmjet të cilit është kryer komunikimi, i dërgon mbajtësit të llogarisë, adresës elektronike ose numrit të telefonit, një njoftim nëpërmjet të njëjtit kanal komunikimi, me anë të të cilit i kërkon fshirjen e përmbajtjes, si dhe mospërsëritjen e veprimeve të tilla, duke e vënë në dijeni se ato përbëjnë shkelje të legjislacionit në fuqi.

2. Në njoftimin e parashikuar në pikën 1, të këtij neni, Policia e Shtetit i ofron personit mundësinë për të përfituar mbështetje psikologjike apo trajtime të tjera të specializuara, kur vlerësohet se ka nevojë për to.

3. Në rast se përmbajtja nuk fshihet ose veprimet e parashikuara në  pikën 1, të këtij neni, përsëriten, Policia e Shtetit ndërmerr masat përkatëse, në përputhje me legjislacionin në fuqi.”.

Pas pikës 2, të nenit 21, shtohet pika 3, me këtë përmbajtje:

“3. Përjashtimisht, Policia e Shtetit regjistron me mjete audiovizuale paralajmërimet për shpërndarjen e tubimit dhe aktet e dhunës ndaj personave ose dëmtimet e pronës gjatë tubimit, sipas ligjit për riparimin e dëmeve të shkaktuara nga dhuna dhe dëmtimet e pronës gjatë tubimeve në hapësirën publike. Regjistrimet ruhen e përpunohen sipas atij ligji dhe ligjit nr.124/2024, “Për mbrojtjen e të dhënave personale.”.

Në nenin 24 bëhen këto ndryshime:

1. Në shkronjat “a” dhe “b”, fjalët “… nga 1000 deri në 10 000 lekë …” zëvendësohen me “… nga 10 000 (dhjetë mijë) deri në 100 000 (njëqind mijë) lekë …”.

2. Në shkronjën “c”, pas fjalëve “… me gjobë …” shtohen “… në masën nga 10 000 (dhjetë mijë) deri në 100 000 (njëqind mijë) lekë …”.

3. Në shkronjën “ç”, pas fjalëve “… me gjobë …” shtohen “… në masën nga 50 000 (pesëdhjetë mijë) deri në 100 000 (njëqind mijë) lekë …”.

Pas nenit 24 shtohet neni 24/1, me këtë përmbajtje:

1. Shkeljet e këtij ligji, kur nuk përbëjnë vepër penale, përbëjnë kundërvajtje administrative dhe dënohen, si më poshtë:

a) Pjesëmarrja në një tubim të ndaluar, në kundërshtim me nenet 8 dhe 12/1, të këtij ligji, dënohet më gjobë në masën nga 10 000 (dhjetë mijë) deri në 100 000 (njëqind mijë) lekë;

b) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjat “a” dhe “c”, të nenit 9, të këtij ligji, dënohet me gjobë nga 10 000 (dhjetë mijë) deri në 100 000 (njëqind mijë) lekë;

c) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjën “b”, të nenit 9, të këtij ligji, dënohet me gjobë nga 20 000 (njëzet mijë) deri në 200 000 (dyqind mijë) lekë;

ç) Mosbindja ndaj urdhrit të policisë për ndërprerjen dhe shpërndarjen e tubimit, të dhënë në përputhje me shkronjën “b”, të nenit 9, të këtij ligji, dhe në rastet kur personi, ndaj të cilit është dhënë urdhri i shpërndarjes, është me identitet të fshehur, dënohet me gjobë nga 50 000 (pesëdhjetë mijë) deri në 500 000 (pesëqind mijë) lekë;

d) Moszbatimi i urdhrit të largimit nga zona e mbrojtur, të nxjerrë në përputhje me nenin 12/2, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë;

dh) Fshehja e identitetit në kundërshtim me nenin 19, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë. Sanksioni i parashikuar në këtë shkronjë nuk zbatohet kur mbulimi i fytyrës justifikohet nga një shkak i ligjshëm, përfshirë arsye shëndetësore, fetare, si dhe ushtrimin e një veprimtarie profesionale, përfshirë gazetarinë dhe medien, ofrimin e ndihmës mjekësore ose vëzhgimin e tubimit;

e) Përdorimi i uniformës, i shenjave ose i simboleve, në kundërshtim me nenin 20, të këtij ligji, dënohet me gjobë në masën nga 50 000 (pesëdhjetë mijë) deri në 100 000 (njëqind mijë) lekë;

ë) Mosbindja ndaj thirrjeve për largim, sipas nenit 23, të këtij ligji, dënohet me gjobë në masën nga 10 000 (dhjetë mijë) deri në 100 000 (njëqind mijë) lekë.

2. Bllokimi i rrugëve automobilistike ose i akseve rrugore gjatë zhvillimit të një tubimi, me pasojë pengimin e qarkullimit të mjeteve të transportit, kur veprimi nuk përbën vepër penale, përbën kundërvajtje administrative dhe dënohet me gjobë në masën 5 000 (pesë mijë) lekë për çdo ditë bllokimi, për çdo person fizik (individ), që merr pjesë në bllokim, pavarësisht kohëzgjatjes së bllokimit gjatë asaj dite.

3. Gjobat vendosen nga Policia e Shtetit, në përputhje me ligjin nr.10279,       datë 20.5.2010, “Për kundërvajtjet administrative”, të ndryshuar.”.

Ky akt normativ hyn në fuqi menjëherë dhe botohet në “Fletoren zyrtare”./et

Fondi limit i tenderit ishte rreth 594.9 mln lekë pa TVSH. Oferta e përzgjedhur është rreth 208.4 mln lekë më e ulët, ose 35% nën këtë vlerë. Financimi parashikohet të mbulohet nga të ardhurat e Bashkisë së Tiranës.

Aksi që do t’i nënshtrohet rikonstruksionit ka një gjatësi prej rreth 6.84 km dhe shërben për aksesin në bizneset dhe objektet industriale të zonës, si dhe në zonat e banuara pranë tij. Raporti teknik evidenton segmente me gropa, çarje dhe ulje të asfaltit, trotuare të dëmtuara dhe probleme me ndriçimin.

Projekti parashikon ndërhyrje në shtresat rrugore, rikonstruksion të trotuareve, bordurave dhe kunetave, si dhe punime për largimin e ujërave të shiut. Në vendkalimet e këmbësorëve do të ndërtohen rampa për personat me aftësi të kufizuara dhe karrocat e fëmijëve.

Gjithashtu, parashikohet ndriçim i ri me kontroll të intensitetit sipas orarit dhe fluksit të përdorimit të rrugës, sinjalistikë horizontale e vertikale, hidrante për mbrojtjen nga zjarri dhe mbjellje pemësh dekorative përgjatë trotuarit./ET

Federata Mbretërore Spanjolle e Futbollit (RFEF) ka vendosur të shtyjë të gjitha 24 ndeshjet e raundit të parë të Kupës së Mbretit, të planifikuara për t’u zhvilluar këtë të mërkurë në Spanjë.

Vendimi është marrë pas përplasjes së dy trenave me shpejtësi të lartë në provincën e Toledos, një ngjarje tragjike që ka tronditur vendin.

Sipas federatës, shtyrja e ndeshjeve të planifikuara gjatë ditës dhe në mbrëmje është një shenjë respekti dhe solidariteti me viktimat e aksidentit dhe familjet e tyre. RFEF ka bërë të ditur se datat e reja të zhvillimit të takimeve dhe oraret përfundimtare do të njoftohen në ditët në vijim.

Mes skuadrave që pritej të nisnin rrugëtimin në këtë edicion të Kupës së Mbretit ishin edhe ekipet e La Ligës, si Valencia, Celta Vigo dhe Real Betis. Ndërkohë, Real Madrid dhe Barcelona do të hyjnë në garë në muajin dhjetor, duke nisur nga faza e 1/16-ve, për shkak të pjesëmarrjes së tyre në Superkupën e Spanjës.

Aksidenti hekurudhor ndodhi pak pas orës 09:00, mes qyteteve Mora dhe Orgaz, në provincën e Toledos. Në përplasjen e rëndë u përfshinë dy trena me shpejtësi të lartë, të kompanive Renfe dhe Iryo, të cilët udhëtonin nga Madridi drejt Seviljes. Në të dy trenat ndodheshin gjithsej 544 persona.

Sipas një përfaqësuesi të autoriteteve të komunitetit autonom të Kastiljes-La Mançës, nga aksidenti dolën nga shinat dy vagona. Në kohën e raportimit, të paktën 46 persona dyshohej se kishin humbur jetën, ndërsa autoritetet lokale paralajmëruan se numri i viktimave mund të rritej.

Pas tragjedisë, Real Madrid dhe Atletico Madrid shprehën ngushëllimet për familjet e viktimave, të plagosurit dhe të gjithë personat e prekur nga kjo ngjarje e rëndë./et

“Qëndron i paprekur zotimi ynë publik, taksa zero mbi fitimin për gjithë biznesin e vogël deri në 2029”, deklaroi Rama, duke nënvizuar se qeveria do të vijojë të mbajë në fuqi këtë angazhim ndaj sipërmarrjeve të vogla.

Një nga ndryshimet kryesore të njoftuara lidhet me sektorin e hotelerisë, ku norma e TVSH-së pritet të rritet nga 6% në 10%, ndërsa agroturizmi do të përjashtohet nga kjo rritje. Sipas kryeministrit, masa synon të nxisë formalizimin e sektorit, në kushtet kur të ardhurat e bizneseve të hotelerisë janë rritur nga viti në vit.

“Rrisim normën e TVSH-së në hoteleri nga 6% në 10%, duke përjashtuar nga kjo rritje agroturizmin. Është një masë që duhet të jetë një mesazh për pronarët e hoteleve, nga të cilët kërkohet formalizim, në kushtet kur të ardhurat e tyre rriten çdo vit”, u shpreh Rama.

Super taksa për apartamentet bosh

Një tjetër element i paketës së paralajmëruar lidhet me pronat e paluajtshme, veçanërisht apartamentet që mbahen bosh dhe nuk jepen me qira, si dhe vilat luksoze në zonat bregdetare.

Rama argumentoi se rritja e shpejtë ekonomike dhe shtimi i kostove të jetesës krijojnë diferenca sociale që kërkojnë ndërhyrje përmes politikave fiskale. Sipas tij, një nga masat që po shqyrtohet është vendosja e një takse më të lartë për pronarët që blejnë apartamente dhe i mbajnë ato bosh, duke mos i nxjerrë në tregun e qirave.

“Një super taksë prone për ata që blejnë dhe mbajnë apartamente bosh, duke refuzuar t’i japin me qira. Është e drejta e tyre, por duhet të paguajnë njësoj siç po bëjnë në disa vende të tjera të Europës që po përballen me koston e rritur të apartamenteve”, u shpreh kryeministri.

Në të njëjtën linjë, Rama njoftoi se qeveria po përgatit edhe një taksim më të lartë për vilat në bregdet, si dhe një çmim të shumëfishuar për ujin që përdoret në pishinat private. Sipas tij, këto masa do të trajtohen përmes një projektligji të veçantë.

“Një super taksë prone për vilat në bregdet. Edhe ata duhet të paguajnë më shumë për pronën e tyre dhe një çmim i shumëfishuar për ujin në pishinat. Kjo shkon në një tjetër ligj”, deklaroi Rama./k.m

Përveç dezinformimit dhe rrezikut për shëndetin publik, këto reklama mund t’i ekspozojnë qytetarët edhe ndaj mashtrimeve financiare dhe vjedhjes së të dhënave bankare!

Një rast shqetësues ky, i keqpërdorimit të inteligjencës artificiale, mrekullisë mahnitëse të shekullit, e cila po përhapet masivisht në rrjetet sociale shqiptare, pikërisht sepse në qendër të këtij dezinformimi të rëndë, është Dr. Flamur Topi, mjek, gazetar dhe themelues i emisionit të njohur televiziv “Trupi dhe Shëndeti”, programi më jetëgjatë në historinë e televizionit shqiptar dhe atij botëror! (që nga 10 prilli 1961)

Në Facebook, po qarkullojnë video të falsifikuara, ku Dr. Topi paraqitet sikur rekomandon barna, preparate apo kura të ndryshme për probleme shëndetësore, veçanërisht për sëmundjet e prostatës, kyçeve, etj.

Videot janë të manipuluara dhe deklaratat që i atribuohen mjekut janë të pavërteta.

Dr. Flamur Topi nuk i ka bërë kurrë këto rekomandime, qoftë edhe një herë të vetme në qindra-mijërat e emisioneve të transmetuara, pa asnjë javë ndërprerje, gjatë 65 viteve në Radio Televizionin Publik Shqiptar!

Videot janë krijuar, duke marrë në Arkivin e pasur të RTSH-së pamje autentike nga episode të vjetra të emisionit “Trupi dhe Shëndeti” dhe, duke zëvendësuar zërin origjinal të mjekut, më se të veçantë, me një zë të gjeneruar mjeshtërisht përmes inteligjencës artificiale, por sidoqoftë të dallueshëm qartë nga të gjithë ata që e kanë njohur nga afër, ose kanë ndjekur besnikërisht në dekada të tëra, emisionet e tij të transmetuara, gjithnjë e gjithnjë, nga Radio Televizioni Kombëtar!…

Madje, nëse dëgjohen me vëmendje, dallohen edhe karakteristikat artificiale të zërit, të cilat nuk përputhen me mënyrën natyrale dhe origjinale të të folurit të Dr. Topit!…

Pamje të vjetra televizive dhe zë i falsifikuar
Personat që kanë krijuar këto video kanë përdorur pamje të regjistruara shumë vite më parë, kur Dr. Flamur Topi ishte më i ri.

Këto pamje janë shkëputur nga konteksti i tyre origjinal dhe janë shoqëruar me deklarata të fabrikuara, për të krijuar përshtypjen e rreme se mjeku po promovon produkte të caktuara farmaceutike…

Duhet sqaruar se Dr. Flamur Topi, që nga viti 2020, nuk është më drejtuesi aktual i emisionit “Trupi dhe Shëndeti”. Programi, që vazhdon transmetimin në RTSH, drejtohet sot nga i biri, Dr. Ilir Topi.

Pikërisht, njohja dhe besueshmëria që figura e Dr. Flamur Topit ka krijuar ndër breza, po shfrytëzohen në mënyrë abuzive, për t’u dhënë kredibilitet këtyre reklamave mashtruese!….

65 vite në ekran, asnjë reklamë për barna!
Një fakt thelbësor, që duhet theksuar, është se gjatë 65 viteve të historisë së tij, emisioni “Trupi dhe Shëndeti” nuk ka bërë asnjëherë reklamë për barna apo preparate mjekësore!…

Që prej transmetimit të parë, më 10 prill 1961, programi ka pasur si mision edukimin shëndetësor të publikut, informimin mbi sëmundjet, parandalimin dhe promovimin e një jetese të shëndetshme.

Për këtë arsye, çdo video që paraqet Dr. Flamur Topin, duke reklamuar barna, preparate apo kura të supozuara është e falsifikuar dhe nuk ka asnjë lidhje me mjekun apo emisionin “Trupi dhe Shëndeti”.

As Dr. Flamur Topi dhe as drejtuesit aktualë të emisionit nuk kanë autorizuar përdorimin e figurës, zërit apo materialeve televizive për promovimin e këtyre produkteve!…

Rrezik për shëndetin dhe të dhënat bankare
Mashtrimi nuk kufizohet vetëm te përhapja e informacioneve të rreme shëndetësore.

Videot publikohen nga faqe me emra të panjohur ose të rremë, të cilat shpesh nuk mund të aksesohen normalisht nga përdoruesit.

Ato shoqërohen me lidhje drejt faqeve të jashtme, ku qytetarët nxiten të blejnë produkte të reklamuara si kura për sëmundje të ndryshme.

Përmes këtyre reklamave, qytetarët mashtrohen, duke u paraqitur rekomandime mjekësore të fabrikuara si deklarata autentike të një mjeku të njohur…

Një rrezik tjetër serioz është mundësia që këto faqe të përdoren edhe për mbledhjen e të dhënave personale dhe bankare të përdoruesve, nën pretekstin e porositjes së produkteve!

Qytetarët duhet të shmangin çdo pagesë apo dhënie të të dhënave bankare në këto faqe.

Paralajmërim i prerë nga “Trupi dhe Shëndeti”
Drejtuesit e emisionit “Trupi dhe Shëndeti” u bëjnë thirrje qytetarëve të mos bien pre e këtyre mashtrimeve.

Çdo bar, preparat apo kurë që reklamohet në këto video, duke përdorur figurën dhe zërin e falsifikuar të Dr. Flamur Topit, nuk rekomandohet prej tij dhe nuk ka asnjë lidhje me emisionin “Trupi dhe Shëndeti”!

Përkundrazi, qytetarëve u rekomandohet shprehimisht të mos blejnë asnjë prej produkteve të promovuara në këto video mashtruese!…

Asnjë prej deklaratave të fabrikuara nuk duhet të konsiderohet këshillë mjekësore.

Përdorimi i inteligjencës artificiale për të falsifikuar deklaratat e një mjeku nuk është thjesht cenim i figurës dhe reputacionit të tij profesional. Ai përbën një formë të rrezikshme dezinformimi, që mund të ketë pasoja të drejtpërdrejta për shëndetin dhe sigurinë financiare të qytetarëve.

Emisioni “Trupi dhe Shëndeti” distancohet plotësisht nga këto materiale, dënon keqpërdorimin e figurës së themeluesit të tij dhe kërkon ndërhyrjen e platformave të rrjeteve sociale, për heqjen e videove të falsifikuara dhe marrjen e masave ndaj personave përgjegjës.

Mesazhi për publikun është i qartë: Videot ku Dr. Flamur Topi reklamon barna dhe kura të supozuara janë të falsifikuara. Mos u besoni, mos blini produktet që promovohen në to dhe mos jepni të dhënat tuaja personale apo bankare.

Në një kohë kur inteligjenca artificiale mund të imitojë fytyrën dhe zërin e kujtdo, keqpërdorimi i figurës së një mjeku të njohur, për të shitur produkte shëndetësore, përbën një kërcënim serioz për besimin e publikut dhe sigurinë e qytetarëve./et

“Do të heqim Taksën e Qarkullimit dhe do ta mbledhim duke e vendosur te makina, përmes Drejtorisë së Transportit Rrugor”, u shpreh kryeministri, në një dalje të jashtëzakonshme për mediat.

Ai theksoi se “çmimi do të ulet menjëherë në 32 lekë direkt në pompë”, duke ju përgjigjur një kërkese të kahershme të drejtuesve të automjeteve, si një masë që do të reflektojë direkt uljen e çmimit të naftës në 32 lekë për litër.

Praktikisht, nëse çmimi i naftës është 220 lekë për litër, me heqjen e Taksës së Qarkullimit, ai do të zbresë automatikisht në 188 lekë për litër. Vjelja e taksës do të bëhet përmes pagesës vjetore të taksave të automjetit.

“Do të vendosim taksë qarkullimi për makinat e huaja që hyjnë në Shqipëri”, u shpreh kryeministri Edi Rama, por nuk sqaroi më tepër nëse kjo taksë do të prekë edhe makinat elektrike./k.m

Nëse do të marrin ‘OK’ nga Qeveria, Paketa Fiskale dhe Buxheti 2027 do të do të duhet më pas të kalojnë përmes procedurave parlamentare dhe të votohen në deputetët në Kuvend.

Buxheti i vitit 2027, sipas paralajmërimeve të kryeministrit Edi Rama dhe kreut të Grupit Parlamentar të PS, Taulant Balla, pritet të jetë më i larti që Shqipëria ka pasur, prej 10 miliardë eurosh.

Me paketën e re fiskale të propozuar nga Qeveria, do të ketë ndryshime të ndjeshme të nivelit të taksave që qytetarët dhe bizneset do të duhet të paguajnë.

Për produktet ushqimore, Qeveria pritet të ulë Tatimin mbi Vlerën e Shtuar nga 20% në 6%. Kjo lëvizje pritet të sjellë një ulje të çmimeve të produkteve të shportës.

Paralelisht, është propozuar edhe rritja e përgjithshme e normës së TVSH-së, në 21%. Një masë e cila do të reflektojë një shtrenjtim të të gjithë produkteve të tjera si dhe shërbimeve.

Ndryshime ka pasur edhe në taksat për bizneset. Për hotelet me 5 yje, agroturizmat dhe për furnizimin e shërbimit të akomodimit në strukturat akomoduese, nga 6% që ky tatim është në fuqi prej vitit 2019, propozohet të rritet në 10%.

Po ashtu propozohet që të ulet pragu për bizneset që duhet të paguajnë TVSH, nga 10 milionë në 5 milionë lekë në vit. Kjo do të thotë se nga viti i ardhshëm të gjitha bizneset me xhiro mbi 5 milionë lekë do të paguajnë TVSH-në prej 21%.

Nga janari i vitit 2021 bizneset me xhiro deri 10 milionë lekë në vit nuk kanë paguar TVSH. Premtim që u materializua në ligj dhe që u premtua se do të zgjaste deri në 2029-ën./k.m

“Ndjej keqardhje për ato që po ndodhin në Shqipëri, por jam shumë i lumtur që nuk ka humbje jete në protestat që prej dy javësh nuk kanë qenë normale, kanë pasur intensitet të fuqishëm. Protesta është e drejtë e sanksionuar nga Kushtetuta dhe çdo personi duhet t’i garantohet të protestojë në mënyrë paqësore. Unë jam me parimin që më shumë fuqi ka fjala sesa guri. Ne shqiptarët nuk duhet të harrojmë nga kemi ardhur. Kemi ardhur nga një sistem diktatorial ku nuk kishim asgjë. Në vitet 1990-1993 nuk kishim as bukë të hanim. Hymë në një cikël të vështirë dhune në vitin 1997, ku u shkatërrua gjithçka, dhe nuk duhet të harrojmë sa ka ecur Shqipëria deri atëherë. Edhe në 1997 ne ishim shumë pranë, pasi kishim nënshkruar Marrëveshjen e Stabilizim-Asocimit, kishim filluar të integroheshim në organizmat ndërkombëtarë, por erdhi një moment që u goditëm. Edhe faktorë të huaj të cilët nuk ia duan të mirën këtij vendi, unë kam qenë në prokurori, në sistemin e drejtësisë, dhe kam parë shumë gjëra të cilat nuk duhej të ndodhnin atëherë. Edhe sot, e njëjta situatë. Sot ne jemi në dekadën e BE-së. Duhen parë problematikat që janë, që duhen korrigjuar, por duhet parë edhe ku kemi arritur”, tha Sula në studion e “Off the Record” .

“Shqipëria sot nuk është më Shqipëria e viteve ‘90. Kjo është një Shqipëri ku edhe pretendimet e të rinjve janë rritur. Përpara vitit 1993 donim të siguronim ushqimin, sot janë rritur të gjitha standartet dhe kërkesat. Sistemi kapitalist ka problematikat e veta, por e rëndësishme është që të paktën Shqipëria është në rrugën drejt Bashkimit Europian”, shtoi Sula.

“Tatimpaguesit, personat fizikë, individët tregtarë dhe të vetëpunësuar apo entitetet, që kryejnë transaksione shitjeje ose blerjeje me para në dorë, në kundërshtim me kufizimet e përcaktuara në pikat 1 dhe 3 të nenit 59, të këtij ligji, dënohen me gjobë në masën 10 për qind të vlerës së secilit transaksion.”, thuhet në projektligj.

Praktikisht nëse një biznes bën një pagesë në cash me vlerë 200 mijë lekë, ndërkohë që limiti është 100 mijë lekë do të paguaj gjobë 20,000 lekë

Prej këtij viti qytetarët nuk mund të bëjnë transaksione me vlerë më të lartë se 500 mijë lekë, apo bizneset jo më të lartë se 100 mijë lekë.

Sipas të dhënave të Bankës së Shqipërisë në muajin gusht 2026, vlera e parasë në qarkullim cash arriti në 534,1 miliardë lekë, nga 483.4 miliardë lekë në fund të dhjetorit 2025, pra një rritje me 10.5%.

Rritja e parasë jashtë bankave vjen në një periudhë kur institucionet po zbatojnë masa për të kaluar në një ekonomi “cashless” pra pa ‘lekë në dorë’.

Rritja e cash-it vjen si rezultat i disa faktorëve, nga zgjerimi i aktivitetit ekonomik, rritja e konsumit, sezoni turistik që shton fluksin e parave, por edhe prej informalitetit apo pastrimit të parave.

Përdorimi masiv i pagesave me lekë në dorë, për ekonominë ka kosto e pasoja negative, pasi qarkullimi i parasë është i pakontrolluar dhe krijon më shumë mundësi për informalitet, ndërsa gjurmimi i transaksioneve është thuajse i pamundur./ET

Harry Kane e ka fituar Topin e Artë të këtij viti, duke lënë pas Lamine Yamalin dhe Kylian Mbappen, por vëmendja tashmë është kthyer te ajo që mund të ndodhë në edicionet e ardhshme të çmimit prestigjioz.

Sipas parashikimeve të një superkompjuteri, Jude Bellingham pritet të jetë fituesi i Topit të Artë në vitin 2027. Mesfushori anglez vjen pas një paraqitjeje mbresëlënëse në El Clasico, ku Real Madridi e mposhti Barcelonën me rezultat 2-1.

Megjithatë, emri që bie më së shumti në sy në këto parashikime është Lamine Yamal. Talenti i Barcelonës ka nisur në mënyrë fantastike sezonin 2026/27, me tetë gola dhe gjashtë asistime në dhjetë ndeshje në të gjitha garat.

Sipas superkompjuterit, Yamal do ta fitojë Topin e Artë në vitin 2028, ndërsa parashikohet të triumfojë edhe në vitet 2031 dhe 2035. Nëse ky skenar realizohet, ylli spanjoll do të bëhej njëri prej futbollistëve më dominues të gjeneratës së tij.

Në vitin 2029, çmimi parashikohet t’i takojë Michael Olise, i cili mund të marrë rolin e liderit te Bayern Munichu. Një vit më vonë, në vitin 2030, superkompjuteri e sheh Erling Haalandin si fitues të mundshëm të çmimit.

Lista vazhdon me Endrickun, i cili parashikohet ta fitojë Topin e Artë në vitin 2032. Braziliani pritet të përmbushë potencialin e tij te Real Madridi dhe të shndërrohet në një prej yjeve kryesorë të futbollit botëror.

Një tjetër emër befasues është Pau Cubarsi. Mbrojtësi i Barcelonës parashikohet ta fitojë çmimin në vitin 2033, duke u bërë mbrojtësi i parë që nga Fabio Cannavaro në vitin 2006 që shpallet fitues i Topit të Artë.

Në vitin 2034, radha sipas parashikimit do të ishte e Arda Gulerit, i cili po synon të fitojë një rol gjithnjë e më të rëndësishëm te Real Madridi.

Parashikimet përfundojnë me Estevaon e Chelseat, të cilit superkompjuteri ia atribuon Topin e Artë të vitit 2036.

Në përgjithësi, këto parashikime sugjerojnë se futbollistët e La Ligës dhe Ligës Premier mund të dominojnë garën për çmimin individual më prestigjioz gjatë dekadës së ardhshme./et