Skuadra gjermane është një emër i njohur për trajnerin e katalunasve, Hansi Flick, i cili beson se përballë verdhezinjve do të arrijë suksesin që do ti siguronte kualifikimin në 1-16-tat. Tekniku gjerman ka treguar dhe recetën se si pritet të dalë Barcelona e tij në fushën e lojës.

“Do të luajmë në një stadium të mrekullueshëm me një atmosferë të shkëlqyer. Do të luajmë në një ambient që të motivon të bësh më të mirën. Ne kemi treguar se jemi një skuadër me cilësi dhe jam i bindur se në Dortmund do të tregojmë futbollin tonë më të mirë. Gjatë një sezoni do të ketë ulje e ngritje, kjo është normale. Kemi pasur dhe probleme me dëmtimet. Por unë kam besim të plotë në skuadrën që drejtoj. I shoh çdo ditë lojtarët e mi që punojnë fort, japin gjithçka, ndaj jam optimist”, u shpreh Flick në konferencën para ndeshjes.

Kujtojmë që Barcelona renditet e gjashta në renditjen e përgjithshme të klasifikimit në formatin e ri të këtij edicioni, teksa me një fitore do të ishin me një këmbë në fazën tjetër, Sa i përket Dortmund, të besuarit e trajnerit Nuri Sahin, pozicionohen një vend më poshtë me pikë të barabarta me katalunasit.